Valsmenn sækja eins örugg 3 stig norður og hugsast getur. Voru betri á öllum sviðum leiksins og breikka bilið í deildinni á milli liðanna.

Viðtöl og skýrsla væntanleg!

Harley Willard reynir að búa sér til skotfæri inní teig Vals, en skot hans fer í varnarmann og aftur fyrir. Ekkert verður úr horninu.

Fær boltann fyrir utan teig Vals og á bylmingsskot framhjá marki Vals.

Rodri og Hallgrímur spila sín á milli fyrir framan vítateig Vals áður en Rodri lætur vaða. Boltinn fer í varnarmann og rétt framhjá marki Vals! Ekkert kemur svo úr horni KA.

Dusan skallar yfir mark Valsmanna. Fær dauðafrían skalla!

Guðmundur Andri kennir sér meins og þarfnast aðhlynningar.

Fólk er farið að tínast heim. Styttist í Íslands-laust Eurovision og veðrið er ekki gott.

Reynir sendingu inná teig en Valsmenn koma boltanum frá og KA reyna að byggja upp sókn á nýjan leik.

Ekkert kemur úr horninu.

Daníel með fína fyrirgjöf þar sem að Ásgeir er í baráttunni um að vinna skallann. Boltinn endar aftur fyrir og KA fær horn.

Hrannar Björn á fína fyrirgjöf inn á teig Vals, þar sem að Ásgeir flikkar boltanum áfram en enginn KA maður nær að koma tá í boltann til að stýra honum í átt að markinu.

Bjarni reynir að þræða boltann í gegnum vörn Vals á Pætur, en Birkir Heimisson gerir mjög vel í að komast inn í sendinguna.

Bjarni er kominn á fætur og leikurinn heldur áfram.

Bjarni vinnur boltann ofarlega og leggur hann á Hallgrím sem að kemst í ágætis færi inní teig Vals en skottilraun hans er blokkuð. Bjarni liggur nú eftir og þarf aðhlynningu.

Hallgrímur Mar klippir inn völlinn af vinstri kantinum og reynir langskot. Það svífur yfir markið.

Adam Ægir með fast skot yfir mark KA. Adam hefur verið virkilega góður í dag, rétt eins og flestir í Valsliðinu.

Þetta fer löturhægt af stað í seinni hálfleik. KA meira með boltann og leita að opnunum.

Ásgeir kemur þessu aftur af stað.

Valsmenn mættu klárir frá fyrsta flauti á meðan að heimamenn eru hreinlega að ganga í svefni hér á Greifavellinum.

Ekkert hjarta og engin barátta í KA liðinu og þegar að það er ekki til staðar að þá er erfitt að vinna fótboltaleiki. Sérstaklega gegn Valsliði sem að er löðrandi í sjálfstrausti og með gæði í öllum stöðum.

Hallgrímur hljóp yfir boltann og Bjarni Aðalsteinsson tók spyrnuna. Hún sveif yfir allan pakkann og endaði með því að Valsarar fengu aukaspyrnu.

KA fær aukaspyrnu úti hægra megin á miðjum vallarhelmingi Vals. Hallgrímur Mar mætir á svæðið.

Adam með stórhættulega fyrirgjöf inná teig KA og Dusan teygir sig í boltann til að stöðva hana, en er hársbreidd frá því að renna boltanum í eigið net!

Ívar Örn brýtur mjög augljóslega á Andra Rúnari á miðjum vellinum, en er steinhissa og önugur yfir því að heyra flautið. Heimamenn þurfa að fara að einbeita sér að réttu hlutunum ef ekki á skelfilega að fara.

Rodri reynir skot fyrir utan teig Vals, en það siglir yfir markið.

Þorri Mar tapar boltanum klaufalega á eigin vallarhelmingi og Aron Jóhannsson fær boltann af sirka 25 metra færi. Hann nennir engu rugli og neglir bara á markið. Boltinn fer þó ekki á markið, heldur rétt framhjá markinu.

Valsmenn fá horn. Þorri setur hann aftur fyrir eftir barning við Guðmund Andra.

Ekkert kemur úr því, en Valur er áfram með boltann.

Gestirnir héldu boltanum þægilega í 1 og hálfa mínútu án þess að KA liðið kæmist í boltann. Nú liggur Birkir Heimisson eftir. Ásgeir Sigurgeirsson var í baráttunni við hann og Valsmenn á bekknum öskruðu á Helga Mikael að Ásgeir ætti skilið að fara í bók dómarans fyrir þessi viðskipti.

Fer í gegnum steinsofandi vörn KA eins og að drekka vatn og skýtur föstu skoti inni í teig KA. Skotið er beint á Steinþór, en hann gerir vel í að ná sterkri snertingu á boltann engu að síður.

Valsmenn ofan á þessa stundina og hafa ýtt KA liðinu ansi neðarlega. Þeir reyna að nýta breiddina og teygja á heimamönnum með því að koma boltanum hratt út á Sigurð Egil og Birki Má.

KA hafa náð að pressa Val ansi hátt síðustu mínútur leiksins, en eiga enn eftir að skapa sér færi. Vörn Vals hefur staðið vaktina óaðfinnanlega fyrsta korterið.

Stutt spil aftast í vörn KA endar ekki betur en svo að boltann berst til Guðmundar Andra sem að skýtur viðstöðulaust yfir Steinþór, en yfir markið líka. Þetta er kæruleysi!

Valsmenn eru miklu grimmari hér í upphafi og KA liðið á erfitt með að ná áttum. Heimamenn reyna nú að tengja saman nokkrar sendingar og byggja upp flæði í sínum leik.

Kristinn Freyr kemur þessu af stað.

Kemur kannski lítið á óvart að Arnar Grétarsson haldi tryggð við sömu 11 og byrjuðu 5-0 leikinn gegn KR. Hjá KA koma Húsvíkingarnir Hrannar Björn Steingrímsson og tveggja marka maðurinn gegn HK, Ásgeir Sigurgeirsson, inn í byrjunarliðið.

Í hinum leiknum sem að byrjar kl. 16:00 í dag mætast KR og Breiðablik. Fullkomið tækifæri til að svara fyrir ófarirnar gegn Valsmönnum eða galopnast sár KR-inga enn meira? Sæbjörn Steinke sér um textalýsingu í Frostaskjólinu og hægt er að fylgjast með leiknum
hér.


Ná Rúnar Kristinsson og KR áttum gegn Íslandsmeisturunum?

Hallgrímur Jónasson, þjálfari KA, var aðstoðarþjálfari Arnars Grétarssonar þegar að hann stýrði KA og var samstarf þeirra gjöfult og árangursríkt. Það verður fróðlegt að sjá hvor vinnur skákina í dag.

,,Það var margt sem að Arnar náði að breyta í KA, sem að ég vildi að yrði breytt og hann gerði margt gott. Hann er mjög skipulagður, er virkilega duglegur og leggur sig fram. Þannig að það er rosa margt jákvætt sem að hann kom með inn og skilur eftir sig í KA,'' sagði Hallgrímur um Arnar þegar að hann var til viðtals hjá norðlenska hlaðvarpinu Bolurinn í desember 2022.

,,Hann (Arnar) þrýstir á hluti og getur alveg verið erfiður þegar hann vill fá sínu fram, en hann bara gerði margt gott fyrir KA og ég er mjög ánægður með að hann er einn af þeim sem að hefur hjálpað til með að breyta menningunni, breyta æfingamenningunni og breyta hugsunarhættinum. Það er erfitt að breyta þannig í félögum og ég hef upplifað það sjálfur að það tekur tíma.''


Fyrrum samstarfsfélagar mætast í dag.

Það er Helgi Mikael Jónsson sem að stendur vaktina í dag.
Hann var í umræðunni eftir leik ÍBV og Víkings R. í síðustu umferð, en þar tryggðu Víkingar sér sigur í blálokin með marki frá Nikolaj Hansen. Markið kom uppúr hornspyrnu, en þar áður hafði Víkingur fengið aukaspyrnu sem að Hermann Hreiðarsson, þjálfari ÍBV, var ósáttur við.

,,Í sjónvarpsupptökum sést þetta aukaspyrnuatvik ekki en það virðist brotið á Alex Frey (Hilmarssyni, leikmanni ÍBV) áður en sú aukaspyrna er dæmd. Það sem ég heyri frá Vestmannaeyjum er að Helgi Mikael hafi beðist afsökunar á ákvörðunum sínum í aðdraganda að marki Víkings, hann hafi spjallað við Hermann Hreiðarsson,'' sagði Elvar Geir Magnússon í Innkastinu.

Jóhann Gunnar Guðmundsson og Andri Vigfússon verða aðstoðardómarar og Aðalbjörn Heiðar Þorsteinsson er fjórði dómari. Vonandi fær leikurinn bara að fljóta vel og ákvarðanir Helga og hans manna verða ekki aðalumræðan eftir leik.


Helgi Mikael dæmir stórleik dagsins.

Arnar Grétarsson sagði skilið við KA síðasta sumar og það var verst geymda leyndarmál fótboltans hér heima að Hlíðarendi væri næsti áfangastaður. Hann hefur nú þegar einu sinni komið á Greifavöllinn síðan þá, þegar að Valsarar unnu Lengjubikarinn en ætli þessi endurkoma sé ekki öllu formlegri.

Valur hefur farið vel af stað á tímabilinu og unnið alla leiki nema einn, þar sem að liðið tapaði 0-2 fyrir Blikum. Nú síðast nudduðu þeir salti í sár erkifjendanna í KR þegar að þeir gjörsamlega slátruðu svarthvítum 5-0 og skoruðu nokkur glæsileg mörk. Hinn 38 ára gamli Birkir Már Sævarsson virðist vera eilífur og lagði upp þrjú mörk í leiknum án þess að blása úr nös.

Þá átti Aron Jóhannsson glimrandi góðan leik á miðsvæðinu og hefur komið frábærlega inn í liðið á þessu tímabili eftir ansi dapurt tímabil í fyrra. Tryggvi Hrafn Haraldsson fann sig einnig vel og skoraði tvívegis - þar á meðal mark þar sem að hann vippaði boltanum yfirvegað yfir Simen Lillevik Kjellevold í marki KR og fullkomnaði þar með niðurlæginguna.

Hægt er að sjá öll mörkin úr leik Vals og KR hér:

Gengi og frammistaða KA í upphafi móts hefur verið ákveðið áhyggjuefni fyrir sérfræðinga og sófasérfræðinga, en flottur endurkomusigur gegn HK mun hafa gert mikið til þess að blása baráttuanda í brjóst leikmanna fyrir verkefnið sem að bíður þeirra síðar í dag.

Þar var það Ásgeir Sigurgeirsson sem að sneri taflinu við fyrir gulklædda og var seinna mark Húsvíkingsins í hæsta gæðaflokki. KA liðið fór ekki í gang fyrr en í seinni hálfleiknum og innkoma Ásgeirs var velkomin vítamínsprauta í sóknarleik liðsins.

Liðið situr í 4. sæti deildarinnar með 11 stig, stigi á eftir Íslandsmeisturum Blika og 4 stigum frá Valsmönnum, sem að verma 2. sætið. Það væri því ekki alvont að tapa gegn lærisveinum Arnars Grétarssonar, en það væri býsna vont.

Hægt er að sjá öll mörkin úr leik KA og HK hér:

Hér fer fram textalýsing á stórleik KA og Vals í Bestu-deild karla. Leikurinn er liður í 7. umferð deildarinnar og fer fram á Greifavellinum á Akureyri.