SKÝRSLAN: Miskunnarlausir Valsarar á Greifavellinum
Hvað réði úrslitum?
Valsmenn voru einfaldlega betri á öllum sviðum leiksins. Þá sérstaklega í fyrri hálfleik. Hefðu hæglega getað verið meira en 3-0 yfir og Arnar Grétarsson fékk skínandi frammistöðu frá flestum á vellinum.
Bestu leikmenn
1. Adam Ægir Pálsson (Valur)
Skoraði tvívegis og spilaði heilt yfir afburðavel.
2. Kristinn Freyr Sigurðsson (Valur)
Er potturinn og pannan í sóknarleik liðsins og flest fer í gegnum þennan ofboðslega hæfileikaríka leikmann. Algjör stoðsendingavél í dag.
Atvikið
Mark Arons Jóhannssonar var í hæsta gæðaflokki. Skottæknin uppá 10,5.
Hvað þýða úrslitin?
Valsmenn fara á toppinn með 18 stig og KA menn sitja eftir í 4. sæti með 11 stig. Næstu leikir liðanna eru í Mjólkurbikarnum, en þar mæta Valsarar Grindvíkingum og KA fara í Kópavoginn og spila við HK.
Vondur dagur
Án þess að taka neitt af frábæru Valsliði, að þá var KA liðið hreint út sagt ömurlegt í fyrri hálfleik. Langt frá mönnum, arfaslakir á boltanum og andleysið algjört.
Dómarinn - 8
Helgi Mikael var bara flottur í dag.