SKÝRSLAN: Magnaðir Víkingar og óður Kjartan Henry
Hvað réði úrslitum?
FH-ingar voru eins og drengir gegn mönnum í fyrri hálfleik. Víkingum var leyft að gera bara nákvæmlega það sem þeim sýndist. FH tekur auðvitað við sér í þeim seinni en skaðinn var nú þegar skeður. Ingvar Jónsson kom þó í veg fyrir að þetta yrði að leik þegar hann ver frábærlega frá Úlfi.
Bestu leikmenn
1. Oliver Ekroth
Eftir erfitt fyrsta tímabil hefur Oliver tekið algjörlega við sér á þessu tímabili. Algjör klettur í vörninni og stýrir varnarlínunni eins og herforingi. Bjargar marki þegar hann sýnir mikinn hraða þegar Kjartan Henry slapp í gegn.
2. Gunnar Vatnhamar
Ég held að ekkert allt of margir hafi verið að deyja úr spenningi yfir þessum manni þegar hann kom en hann hefur þaggað í efasemdarröddunnum. Spilar sem hafsent í dag en er djúpur miðjumaður þegar þeir sækja. Hann er mikilvægur partur af uppspilinu og líður frábærlega með boltann í fótunum. Hefur að einhverju leiti minnkað missinn af Júlíusi Magnússyni.
Atvikið
Það er brotið á Kjartan Henry og hann gerir í kjölfarið tilraun til þess að sparka í andlitið á Birni Snæ. Hefði getað slasað Birni mjög alvarlega og það er aganefndinni til skammar að mínu mati ef Kjartan Henry er ekki dæmdur í bann fyrir þetta atvik.
Hvað þýða úrslitin?
Víkingar vinna fyrstu 7 leikina og setja félagsmet og eru auðvitað á toppnum. FH sitja í 6. sæti með 10 stig.
Vondur dagur
Kjartan Henry Finnbogason var ekki sjálfum sér til sóma í dag. Hann hagar sér eins og bjáni nokkrum sinnum í dag og er heppinn að hafa ekki fengið rautt spjald. Sparkið í átt að andliti Birnis var gjörsamlega til skammar.
Dómarinn - 5
Pétur var svosem ágætur í dag. Neglir til dæmis ákvörðunina með rauða spjaldið í dag á Finn Orra. Kjartan Henry á hinsvegar aldrei að fá að klára þennan leik. 2-3 atvik sem verðskulda brottrekstur.