Afturelding vinnur hér frábæran 0-3 sigur. Rauða spjaldið sem Guðjón Pétur fékk hafði auðvitað mikil áhrif á þennan leik. Afturelding og Fjölnir eru saman á toppnum eftir fimm leiki en þetta er fyrsta tap Grindavíkur í sumar.

Viðtöl og skýrsla koma inn á síðuna á eftir.

Bara uppbótartíminn eftir.

Dagur Örn Fjeldsted með góðan bolta fyrir markið en nafni hans, Traustason, nær ekki að setja höfuðið í boltann.

Gerir frábærlega og er í kjörstöðu til að skora þriðja mark Mosfellinga, en hann setur boltann rétt fram hjá markinu.

Útlit fyrir það að Fjölnir og Afturelding verði jöfn á toppi deildarinnar eftir þessa umferð. Fjölnir er að vinna sigur upp á Akranesi í þessum skrifuðu orðum.

Tómas Orri með sendingu sem fer aftur fyrir endamörk. Það er smá hiti í þessu ennþá og menn eru láta hvorn annan heyra það.

Grindvíkingar mega eiga það að þeir eru að reyna en það hefur lítið komið út úr því síðustu mínúturnar.

Grindavík átti mjög góðar fimm mínútur þarna áðan. Spurning hvort þeir séu búnir ða missa af tækifærinu sínu.

Kristófer með frábæran bolta fyrir, Tómas Orri tekur á móti honum og nær skoti en það er langt yfir. Þarna hefði hann átt að gera mun betur.

Grindvíkingar allt í einu að ógna. Hafa ekki verið líklegir framan af í seinni hálfleiknum en þarna fengu þeir færi til að skora og minnka muninn, að búa til leik úr þessu.

Óskar Örn í góðu skallafæri nálægt markinu og nær hann flottum skalla en Yevgen er traustur sem fyrr og nær að verja.

Maður hefur það á tilfinningunni að það sé stutt í þriðja mark Aftureldingar. En hvað veit maður?

Aron Elí með sendingu fyrir markið og Bjartur Bjarmi er í skotfæri, en Kristófer nær að koma sér fyrir.

Aron Dagur, markvörður Grindvíkinga, kemur út úr marki sínu en á afar vonda sendingu sem fer beint á Elmar Kára. Hann reynir skot af svona 35-40 metrum en fram hjá fer boltinn.

Óskar Örn er núna að spila sem fremsti maður í 4-4-1 kerfi Grindvíkinga.

Leikmenn eru að koma aftur út á völl.

Maður er eiginlega enn að jafna sig á þessu öðru marki Aftureldingar. Það verður ekki tekið af Mosfellingum að þeir spila ótrúlega flottan fótbolta. Auðvitað þægilegra fyrir þá að vera manni fleiri en samt... geggjaður fótbolti.

Erlendur flautar til hálfleiks og Mosfellingar ganga sáttir til búningsklefa, tveimur mörkum yfir og manni fleiri. Það er erfitt að sjá einhverja leið fyrir Grindvíkinga til baka. Spurning hvort spáin hans Gunna Birgis rætist í seinni hálfleiknum.

Sleppur inn fyrir vörn Aftureldingar og er að munda skotfótinn þegar Gunnar Bergmann kemur aðsvífandi og bjargar með stórkostlegri tæklingu.

Markið sem Afturelding var að skora er ruglað flott. Þetta eru einhverjar 30-40 sendingar áður en Ásgeir skorar; boltinn fer frá hægri til vinstri, frá vinstri til hægri. Stórkostlegt spil.

Hætta inn á teig Grindavíkur en Kristófer nær að koma boltanum í burtu á ögurstundu.

Fyrirliðinn næstum því búinn að gera sitt annað mark í leiknum en hann skallar rétt fram hjá markinu eftir hornspyrnu.

Afturelding, sem hefur átt mjög góða spilkafla í fyrri hálfleiknum, er með algjöra stjórn á þessum leik og Grindavík hefur ekkert náð að byggja upp eftir að þeir misstu Guðjón Pétur út af.

Aron Elí með frábæra hugmynd en sendingin aðeins of föst fyrir Elmar.

Bjartur Bjarmi með góðan sprett upp völlinn en vantar svo aðeins upp á ákvörðunartökuna þegar komið er á síðasta þriðjung. Reynir skot sem fer beint í varnarmann.

Stuðningsmenn Grindavíkur syngja áfram þrátt fyrir að það gangi ekki vel inn á vellinum.

Þetta er líklega eins vondur fyrri hálfleikur hingað til og hann hefði getað orðið fyrir Grindavík; eru marki og manni færri.

Var að horfa á myndbandsupptöku af þessu rauða spjaldi. Guðjón Pétur virðist eitthvað kýla frá sér í baráttu við Georg út við hliðarlínu. Georg hélt í kjölfarið um höfuð sitt og svo kom rauða spjaldið.

Grindavík fær tvær hornspyrnur en það kemur lítið úr þeim.

Afturelding reynir að spila frá aftasta manni og það kemur smá í bakið á þeim þarna. Ásgeir Frank með glæfralega sendingu sem Guðjón Pétur kemst inn í. Hann kemur honum á Horvat sem gerir vel í að ná góðu skoti á markið en Galchuk ver frábærlega!

Afturelding fær vítaspyrnu!

Jason Daði og félagar úr Mosfellsbænum tóku trommurnar með sér og eru líka að reyna að búa til stemningu. ,,Lærðu að tromma, lærðu að tromma," syngja stuðningsmenn Grindavíkur.

Ásgeir Marteins fær boltann utarlega í teignum og lætur vaða, en þetta skot fer vel fram hjá markinu.

Hef líklega ekki upplifað eins góða stemningu á fótboltaleik hér á Íslandi í sumar. Er Grindavík með bestu stuðningsmannasveit landsins?

Óskar Örn fær boltann vinstra megin og keyrir í átt að teignum. Hann fellur svo rétt fyrir utan teiginn en Erlendur dæmir ekki neitt. Hann var mjög vel staðsettur og ég ætla að treysta því að hann hafi verið með þetta á hreinu.

Arnór Gauti, sóknarmaður Aftureldingar, með langt innkast en það er auðvelt fyrir Aron Dag að grípa inn í.

"Meira svona, meira svona," syngja stuðningsmenn Grindavíkur.

Horvat sleppur í gegn en er dæmdur rangstæður. Þetta var mjög tæpt held ég. Vörn Aftureldingar virkar ekki mjög sannfærandi á þessum fyrstu mínútum.

Hornspyrnan er slök og Ásgeir Marteins kemur boltanum í burtu.

Dagur Ingi Hammer kominn í mjög fínt færi en Aron Elí, fyrirliði Aftureldingar, bjargar frábærlega. Grindavík fær svo hornspyrnu.

Þessi veisla er farin af stað!

Ég get fullvissað ykkur um það, lesendur góðir, að stuðningsmenn Grindavíkur eru svo sannarlega í góðum gír.

fimmtudagur 1. júní
19:15 Grindavík-Afturelding (Stakkavíkurvöllur)
19:15 Selfoss-Þróttur R. (JÁVERK-völlurinn)
19:15 ÍA-Fjölnir (Norðurálsvöllurinn)

Þegar þessi lið mættust á þessum velli í fyrra þá vann Afturelding 4-5 sigur þar sem Marciano Aziz gerði sigurmarkið. Ég hefði ekkert á móti því að sá aðra eins veislu hérna í kvöld.

Liðin eru á fullu í upphitun. Ég er gríðarlega spenntur að sjá hvernig þessi leikur spilast. Þetta eru liðin í öðru og þriðja sæti deildarinnar, þetta ætti að geta orðið hörkuskemmtun!

Annars var Stinningskaldi, stuðningsmannahópur Grindavíkur, að mæta í stúkuna og þeir eru byrjaðir að láta vel í sér heyra. Gaman að því. Ég var farinn að óttast að það yrðu bara 20 manns sirka í stúkunni hér í kvöld, en það er búið að bætast vel við síðustu mínútur.

Þá er maður mættur í Grindavík. Það er ekki hægt að segja að hér sé fallegt veður, langt því frá. Það er allavega ekki eins gott og hjá nafna mínum í Árbænum.

Rétt tæplega 40 gráður hér í lautinni, byrjum 19:00
Fylkir-KR #Bestadeildin pic.twitter.com/RsOJSImDgv

— Gummi Ben (@GummiBen) June 1, 2023

Íþróttafréttamaðurinn Gunnar Birgisson spáir í umferðina í Lengjudeildinni fyrir Fótbolta.net. Hann spáir því að Afturelding vinni gríðarlega flottan útisigur í kvöld.

Grindavík 0 - 4 Afturelding
Kósýkvöld hjá Magga the entertainer og hans mönnum sem oft eru nefndir Birgisson Boys. Þeir vita sem vita. Mikið posession, hátt xG og allt það helsta, Grindvíkingar með hausinn við bikarinn enn sem komið er og Jón Júlíus framkvæmdastjóri Grindvíkinga flaggar víst fána ESB daglega á Grindavíkurvelli. „Umdeilt en árangursríkt" segja bæjarbúar.

Félögin hafa spilað 15 mótleiki á vegum KSÍ í sögunni samkvæmt vef KSÍ.

Grindavík hefur 8 sinnum (53%) farið með sigur af hólmi.
Afturelding hefur 4 sinnum (27%) farið með sigur af hólmi.
Liðin hafa þá skiptst á jöfnu í þrígang (20%).

Grindavík hefur einnig farið gríðarlega vel af stað í deildinni og er sömuleiðis eitt þessa þriggja liða sem er taplaust við toppinn.

Grindavík hefur sigrað ÍA, Njarðvík og Vestra auk þess að gera jafntefli við Gróttu. Í síðustu umferð gerðu Grindvíkingar góða ferð vestur og sóttu öll þrjú stigin gegn Vestra þegar þeir sigruðu með tveimur mörkum gegn engu.

Grindavík hefur skorað fimm mörk í deildinni til þessa og ekki enn fengið á sig mark en mörk Grindavíkur hafa skorað:

Óskar Örn Hauksson - 2 Mörk
Marko Vardic - 1 Mark
Guðjón Pétur Lýðsson - 1 Mark
Dagur Ingi Hammer Gunnarsson - 1 Mark

Afturelding hefur farið gríðarlega vel af stað í sumar og er eitt þriggja liða sem er enn taplaust.

Afturelding hefur lagt Selfoss, Þór Akureyri og Gróttu og gert jafntefli við ÍA fyrir leikinn í kvöld. Í síðustu umferð sóttu þeir góðan sigur gegn Gróttu þegar þeir unnu með þrem mörkum gegn tveimur.

Afturelding hefur skorað átta mörk í deildinni til þessa. Markaskorararnir eru:

Arnór Gauti Ragnarsson - 3 Mörk
Ásgeir Frank Ásgeirsson - 1 Mark
Sævar Atli Hugason - 1 Mark
Oliver Bjerrum Jensen - 1 Mark
Gunnar Bergmann Sigmarsson - 1 Mark
Aron Elí Sævarsson - 1 Mark

Erlendur Eiríksson heldur utan um flautuna í kvöld og honum til aðstoðar verða Sveinn Ingi Sigurjónsson Waage og Helgi Hrannar Briem.
Eftirlitsmaðurinn í kvöld er Eyjólfur Ólafsson.

Lengjudeildin hefur farið fjörlega af stað og þegar fjórar umferðir eru búnar lítur staðan svona út:

1.Fjölnir - 10 stig
2.Grindavík - 10 stig
3.Afturelding - 10 stig
4.Selfoss - 6 stig
5.Þór Ak - 6 stig
6.Njarðvík - 5 stig
7. ÍA - 5 stig
8. Þróttur R. - 4 stig
9.Leiknir R. - 3 stig
10.Grótta - 3 stig
11.Vestri - 2 stig
12.Ægir - 1 stig

Verið hjartanlega velkominn í þessa þráðbeinu textalýsingu frá leik Grindavíkur og Aftureldingar í 5.umferð Lengjudeildarinnar hér á Stakkavíkurvelli í Grindavík.