SKÝRSLAN: Ægi hleypt heim í Urriðaholtið?
Hvað réði úrslitum?
Skemmtilegur leikur þar sem bæði lið voru að sækja, allt annað að sjá þetta en það sem átti sér stað á sama velli fyrir rúmri viku síðan. Áhorfendur, sem létu vel í sér heyra sem er frábært, fengu nóg fyrir peninginn, 120 mínútur og þrjú góð mörk. Ægir Jarl, sem býr í Urriðaholti í Garðabæ, reyndist hetjan alveg eins og í deildarleiknum.
Bestu leikmenn
1. Finnur Tómas Pálmason
Geggjaður í leiknum, steig ekki feilspor og er að finna sig svo sannarlega vel í nýja leikkerfinu. Finnur er frábær varnarmaður sem er að koma aftur upp eftir öldudal.
2. Jóhannes Kristinn Bjarnason
Fagnaði U19 valinu með frábærri frammistöðu, hélt Ísaki Andra niðri og var flottur á báðum endum. Annar sem var virkilega góður í leiknum var Theodór Elmar sem sýnir reglulega þau löðrandi gæði sem hann býr yfir, unun að horfa á hann spila fótbolta.
Atvikið
Fyrst var það jöfnunarmark Baldurs, svo klúðrið hjá Aroni Þórði í lok venjulegs leiktíma en svo varð aðalatvikið virkilega gott sigurmark Ægis.
Hvað þýða úrslitin?
KR er komið í undanúrslit þar sem liðið mætir Víkingi á útivelli. Stjarnan er úr leik.
Vondur dagur
Aldrei gott að klikka á víti.
Dómarinn - 7,5
Flottur í dag, flæðið í leiknum gott.