SKÝRSLAN: Valsarar halda toppsætinu
Hvað réði úrslitum?
Þórdís Elva var það sem skildi liðin að í dag. Þetta var þannig leikur að það þurfti eitt moment af algjörum gæðum og það var hún sem bauð upp á það með geggjuðu marki sem skilaði sigrinum.
Bestu leikmenn
1. Þórdís Elva Ágústsdóttir
Mér finnst Þórdís alltaf skila sínu þegar hún reimar á sig takkaskóna. Hún var flott í dag og skoraði auðvitað þetta rosalega sigurmark.
2. Melissa Anne Lowder
Þrátt fyrir að henni hafi ekki tekist að halda markinu hreinu þá ætla ég að setja þetta á Melissa. Það spilar bæði inn í að enginn átti einhverja stjörnuframmistöðu í leiknum en Melissa hélt sínu liði inn í þessum leið. Hún var vel vakandi fyrir krossum sem komu inn í teig og varði nokkrum sinnum vel. Hún hefði ekki getað gert neitt í markinu þó að Þórdís hefði sagt henni fyrir leik hvert hún ætlaði að setja hann.
Atvikið
Í nokkuð tíðindalitlum leik var það sigurmarkið frá Þórdísi. Eins og áður segir voru Valsarar í basli að koma boltanum í markið og hún tók það bara í sínar hendur og kláraði þetta.
Hvað þýða úrslitin?
Valsarar vinna þriðja leikinn í röð, halda sér á toppnum og fara upp í 16 stig. Þór/KA fara niður í 6. sæti þar sem að FH vann sinn leik í kvöld og fara því upp fyrir þær og taka 5. sæti.
Vondur dagur
Færanýting Vals í dag var ekki góð svo vægt sé til orða tekið. Bryndís Arna átti að skora í þessum leik fannst mér en henni tókst ekki að finna netið. Hún getur, þrátt fyrir það, alveg sofið vært í nótt þar sem það kom ekki að sök í þetta skiptið. Ásdís Karen hefði líka auðveldlega getað orðið skúrkurinn eftir að hafa klúðrað víti en, eins og Bryndís, þarf hún ekki að velta sér mikið upp úr því.
Dómarinn - 9
Ég hef lítið til þess að kvarta yfir þegar kemur að Gunnari og hans teymi í kvöld. Hann hefði alveg getað lyft fleiri gulum spjöldum en ekkert alvarlegra en það. Eina stóra ákvörðunin var vítið og mér fannst það hárrétt hjá honum.