SKÝRSLAN: Niður í fallsæti og upp úr því aftur
Hvað réði úrslitum?
Það voru erfiðar aðstæður og vindurinn hafði áhrif. Þrátt fyrir að fótboltinn sem hafi verið í boði hafi ekki verið fallegur þá var leikurinn spennandi og skemmtilegur en á endanum var það Fram sem hafði betur og svaraði glæsilega eftir skellinn í Kaplakrika. Mun betri liðsframmistaða hjá þeim bláu í dag.
Bestu leikmenn
1. Guðmundur Magnússon - Fram
Var öflugur í fremstu víglínu og skoraði gríðarlega mikilvægt mark aðeins mínútu eftir að HK jafnaði 1-1.
2. Hlynur Atli Magnússon - Fram
Var óvænt í vinstri bakverðinum og leysti þá stöðu mjög vel.
Atvikið
Rosalegt mark Orra Sigurjónssonar frá hliðarlínunni. Ætlaði væntanlega að senda fyrir en vindurinn greip boltann og hann flaug í netið!
Hvað þýða úrslitin?
Rétt áður en leikurinn hófst var Fram dottið niður í fallsæti vegna sigurs ÍBV gegn KA. Framarar komust hinsvegar aftur upp úr fallsætinu með sigrinum. HK hefur tapað fimm af síðustu sex leikjum og er í sjöunda sæti.
Vondur dagur
Það stefndi nákvæmlega ekkert í markaleik eftir hálftíma en mörk breyta leikjum og Fram komst yfir eftir vítaspyrnu. Ahmad Faqa rann þá til í teignum og fékk boltann í hendina. Réttilega dæmd vítaspyrna.
Dómarinn - 7,5
Sérdeilis prýðilega dæmt hjá Sigurði Hirti.