SKÝRSLAN: Blikar í bikarúrslit eftir sigur í vító
Hvað réði úrslitum?
Þegar öllu var á botninn hvolft virtust Blikarnir vera betur stilltar í vítaspyrnukeppninni. Stjarnan átti að vera búin að klára þennan leik en allt kom fyrir ekki. Þær áttu þrjú skot í slá í leiknum og þetta var bara pínu þannig hjá þeim í dag, sláin út.
Bestu leikmenn
1. Andrea Mist Pálsdóttir
Andrea Mist átti frábæran leik í dag. Hún var ótrúlega öflug inná miðjunni hjá Stjörnunni og barðist eins og ljón. Ekki bara var mikil orka og barátta í henni en hún var að halda vel í boltann og koma honum vel frá sér. Hún kórónaði svo góðan leik með því að skora seinna mark Stjörnunnar.
2. Telma Ívarsdóttir
Ég ákvað að velja Telmu vegna þess að hún hélt Blikum inn í þessum leik með nokkrum fínum vörslum í leiknum sjálfum og svo varði hún auðvitað vítið frá Úlfu.
Atvikið
Vítaspyrnan sem Telma varði fór langleiðina með að klára þetta fyrir Blika. Stjarnan hafði þá klikkað á fyrstu tveimur spyrnunum og þá var brekkan orðin ansi brött.
Hvað þýða úrslitin?
Bikarinn er ekki flókinn, liðið sem vinnur fer áfram og ekki hitt. Blikar fara því í bikarúrslit þriðja árið í röð og mæta þar Víkingi R.
Vondur dagur
Á þeim 120 mínútum sem voru spilaðar í dag var enginn einn leikmaður sem stóð sérstaklega upp úr fyrir það að vera að eiga slakan leik. Þetta verður því að fara á Úlfu og Gyðu Kristínu sem klikkuðu á sínum vítaspyrnum í dag. Eftir mjög góða innkomu hjá báðum var þetta ekki þeirra dagur á punktinum.
Dómarinn - 8
Mér fannst Gunnar Freyr og hans teymi komast vel frá þessu í dag. Alltaf hægt að pikka eitthvað út hér og þar en heilt yfir bara vel gert. Leyfði leiknum að flæða nokkuð vel fannst mér og engar stórar ákvarðanir rangar.