Tóku einn sigur og töpuðu tveimur. Frakkland og Spánn klárlega bestu liðin í þessum riðli, en afrekið að komast á þetta mót er stórt. Íslenska liðið á skilið mikið lof fyrir að komast alla þessa leið og það er ljóst að framtíðin er björt. Áfram Ísland!

Enn skapast hætta eftir fast leikatriði hjá Frakklandi. Fanney grípur boltann að lokum.

Þrjár síðustu mínútur Íslands á þessu móti.

Allur vindur úr íslenska liðinu og þetta mark var á leiðinni.

Marques með skot sem var að fara langt fram hjá markinu, en Fanney ver boltann fram hjá.

Ribadeira alein inn á teignum eftir hornspyrnu en hún skallar fram hjá markinu. Algjört dauðafæri að bæta við þriðja markinu fyrir Frakka.

Frakkarnir eru talsvert líklegri til að bæta við þriðja markinu en Ísland að jafna.

Frakkar fá mjög gott færi eftir aukaspyrnu en Fanney Inga ver glæsilega!

Íslenska liðinu hefur gengið illa að ná stjórn á boltanum í síðari hálfleik og stelpurnar hafa ekki náð að skapa sér mikið.

Gilbert með laflaust skot að marki sem Fanney handsamar.

Það eru 434 áhorfendur á leiknum í kvöld, margir Íslendingar.

Íslensku stuðningsmennirnir láta vel í sér heyra og hvetja liðið áfram.

Ísabella Sara með frábæran sprett upp hægri vænginn og sækir innkast. Afar flottir taktar hjá þessum efnilega leikmanni.

Leikurinn er farinn að róast talsvert. Það er spurning hvort íslensku stelpurnar eigi eitthvað eftir á tankinum til að jafna leikinn. Það yrði mjög skemmtilegt að ná því.

Baby-Jordy Benera með hörkuskot fyrir utan teig sem fer rétt fram hjá markinu.

Emilía sýnir frábæra takta og á svo fyrirgjöf sem Ísabella nær ekki til. Boltinn dettur út fyrir Birnu Kristínu utan teigs og hún lætur bara vaða. Fínt skot en Marques ver það og heldur boltanum.

Snædís á svo skotttilraun fyrir utan teig sem fer beint í varnarmann.

Írena komin í góða stöðu en úrslitasendingin á Snædísi klikkar.

Ribadeira snýr á Mikaelu og kemst í ágætis færi en Fanney nær að verja og halda boltanum. Skotið var laust.

Vantar þessa frægu ró á boltann. Þýðir ekkert að vera senda boltann langt upp völlinn þegar það er enginn íslenskur leikmaður þar nálægt.

Síðari hálfleikur er hafinn.

Fyrri hálfleik lokið. Ágæt frammistaða hjá íslenska liðinu en það var vont að fá þetta annað mark á okkur í lok fyrri hálfleiks. Möguleikar Íslands á að komast áfram eru svo gott sem engir, því miður.

Frakkar með hornspyrnu sem Fanney gerir vel í að kýla frá markinu.

Vigdís Lilja virðist vera með góða tæklingu en það er flautað brot. Vigdís pirruð með þennan dóm.

Núna þurfum við bara þrjú mörk í viðbót.

Bergdís er fædd árið 2006 og spilar með Víkingi. Afar efnilegur miðjumaður þarna á ferðinni.

Alice Marques með skot af löngu færi en það fer yfir markið.

Fín sókn hjá Íslandi og Emilía fær nokkuð gott færi, en skot hennar er ekki nægilega gott.

Vigdís með góða fyrirgjöf en hún er aðeins of há fyrir Emilíu sem var inn á teignum. Flott spil hjá íslenska liðinu.

Íslenska liðið þarf að skora sem fyrst ef það ætlar að eiga möguleika á því að fara upp úr riðlinum. Þetta er ansi erfitt verkefni.

Baby-Jordy Benera - skemmtilegt nafn - tekur skot fyrir utan teig en það fer yfir markið.

Neller vinnur boltann af Írenu og kemst í gott skotfæri, en það er þægilegt fyrir Fanneyju að verja skotið.

Spánn að rústa Tékklandi. Úr leik Íslands og Spánar.

Katla við það að stela boltanum og koma sér í góða stöðu við vítateig Frakklands en hún missir hann aðeins of langt frá sér.

Frakkland fær tvær hornspyrnur en þær ná ekki að gera neitt úr þeim.

Darraðadans í teignum eftir hornspyrnu Íslands. Snædísi Maríu er augljóslega ýtt en það er ekkert dæmt. Þetta var pjúra vítaspyrna að mínu mati, klár bakhrinding. Pólskur dómari leiksins, Ewa Augustyn, sá ekkert athugavert við þetta.

Vont verður verra. Spánn komið í 2-0 gegn Tékklandi. Ísland þarf að vinna Frakkland með þremur mörkum, það er nokkuð ljóst.

Emelía byrjar af krafti og reynir fyrirgjöf, en Marques í marki Frakka handsamar boltann.

Sigdís Eva liggur eftir og heldur um höfuð sitt.

Bogaert í góðri fyrirgjafastöðu og sendir boltann fyrir, en hann fer aftur fyrir endamörk. Þetta var hættulegt en Frakkarnir eru að byrja betur og eru hættulegar.

Chossenotte komin í mjög hættulega stöðu en nær ekki að taka boltann með sér.

Spánverjar eru komnir yfir gegn Tékklandi. Það er ekki gott fyrir okkur Íslendinga. Ef Spánn vinnur sinn leik þá þýðir það að við þurfum að vinna Frakkland með þremur mörkum.

Ribadeira með skot að marki fyrir utan teig, en Fanney grípur boltann örugglega. Þægilegt fyrir Valskonuna í markinu.

Íslensku stuðningsmennirnir láta vel í sér heyra líkt og venjulega. U19 landsliðin okkar hafa fengið stórkostlegan stuðning í sumar.

Þetta er farið af stað. Áfram Ísland!

Íslenski þjóðsöngurinn að baki. Það heyrðist mjög vel í stelpunum okkar þegar þær sungu hann.

Liðin að ganga út á völl og stemningin er að magnast.

Búið er að opinbera byrjunarliðið fyrir leikinn gegn Frakklandi í kvöld. Það er ein breyting á byrjunarliðinu frá sigrinum gegn Tékklandi í síðustu viku. Birna Kristín Björnsdóttir, bakvörður FH, kemur aftur inn í liðið í staðinn fyrir Eyrúnu Emblu Hjartadóttur. Bergdís Sveinsdóttir og Sigdís Eva Bárðardóttir, leikmenn Víkings, sem komu inn í liðið fyrir síðasta leik gegn Tékklandi halda sæti sínu í liðinu. Birna Kristín Björnsdóttir.

Það er komin upp ansi áhugaverð staða í riðlinum fyrir lokaumferðina en það er möguleiki á því að íslenska liðið endi með sex stig og fari samt ekki áfram. Frakkland er með sex stig fyrir lokaumferðina eftir sigra í fyrstu tveimur leikjum sínum en svo koma Ísland og Spánn með þrjú stig. Spánverjar mæta Tékklandi í kvöld og eru ansi sigurstranglegar í þeim leik. Ísland þarf að öllum líkindum sigur gegn Frakklandi í kvöld til þess að komast áfram, þar sem það eru miklar líkur á því að Spánn vinni Tékkland. En ef Spánn tapar gegn Tékklandi þá dugir Íslandi jafntefli til að komast áfram. Ef Spánn gerir jafntefli, þá þarf Ísland samt sem áður að vinna. Ef öll þrjú liðin enda með sex stig þá ræðst þetta á markatölu í innbyrðis viðureignum. Ísland tapaði 0-3 gegn Spáni í fyrsta leik og það gerir það að verkum að Ísland þarf að vinna með þriggja marka mun í kvöld ef öll liðin enda með sex stig. Innbyrðis viðureignir: 1. Frakkland - 3 stig (2-0 í markatölu) 2. Spánn - 3 stig (3-2 í markatölu) 3. Ísland - 0 stig (0-3 í markatölu) Ísland þarf þá helst að treysta á það að Tékkland stríði Spáni - af því að það verður erfitt að vinna Frakkland og hvað þá stórt - en báðir leikirnir hefjast klukkan 18:30 í kvöld.

Katla Tryggvadóttir, sem gegnir lykilhlutverki í liðinu, hefur fulla trú á að liðið geti náð góðum árangri gegn Frökkum. „Þetta var gríðarlega góð tilfinning og mjög mikilvægt fyrir okkur að ná í þrjú stig.“ „Það hefur gengið vel og erum alveg búnar að ýta þessum sigri til hliðar og komnar með fullan fókus á mótum Frökkum. Við undirbúum okkur alltaf eins, við erum mjög spenntar fyrir þessu verkefni og höfum fulla trú á þessu,“ sagði Katla.

?????Katla Tryggvadóttir kom í stutt spjall eftir æfingu í dag.

Ísland ???????? - Frakkland ????????
? Á morgun klukkan 18:30
???? Í beinni útsendingu á RÚV 2#dottir pic.twitter.com/2V1psMW8vN

— Knattspyrnusambandið (@footballiceland) July 23, 2023

Ísland tapaði fyrsta leiknum gegn Spánverjum en lagði síðan Tékkland að velli, 2-0, í annarri umferð riðlakeppninnar. Frakkar hafa unnið báða leiki sína til þessa en Ísland þarf líklega sigur til að eiga möguleika á að komast áfram. Jafntefli gæti dugað en þá þarf Tékkland að vinna Spánverja. Margrét Magnúsdóttir, þjálfari landsliðsins, ræddi um leikinn: „Það var auðvitað mikil ánægja með síðasta leik en eins og við töluðum um þá var mikilvægt hjá okkur að stilla okkur af og fókusa á næsta leik sem við höfum verið að gera.“ „Bara mjög vel. Áttum góðan dag í gær og fengu frídag með fjölskyldum sínum, svona lang flestar, en þetta var mjög góður dagur og þær eru ferskar.“ „Það er góð stemning í hópnum og erum búin að ná að undirbúa okkur vel. Þetta eru leikirnir sem við viljum spila og leikmenn elska að takast á við svona aðstæður og þessa leiki og það er það sem við ætlum að gera,“ sagði Margrét.

?????Margrét Magnúsdóttir kom í stutt spjall eftir æfingu í dag.
Ísland ???????? - Frakkland ????????
? Á morgun klukkan 18:30
???? Í beinni útsendingu á RÚV 2#dottir pic.twitter.com/n7NAUkxyIA

— Knattspyrnusambandið (@footballiceland) July 23, 2023

Heil og sæl! U19 landslið kvenna mætir Frakklandi í síðustu umferð riðlakeppninnar á lokakeppni EM í Belgíu. Leikurinn skiptir gríðarlega miklu máli en Ísland setur stefnuna á að komast áfram. Íslenska liðið er jafnt Spáni á stigum með þrjú stig hvort en Frakkar efstir í riðlinum með sex stig. Lokaumferð riðilsins: 18:30 Spánn - Tékkland 18:30 Frakkland - Ísland Leikur Frakklands og Íslands verður sýndur í beinni útsendingu á RÚV 2.