SKÝRSLAN: Stjörnum prýtt Valslið skoraði sjö mörk í eyjum
Hvað réði úrslitum?
Valur er miklu betra fótboltalið og með fimm nýjum leikmönnum í hópinn í júlíglugganum verður munurinn svona afgerandi eins og sést í dag. Við getum nánast talið upp í sjö líka því landsliðskonurnar Anna Björk Kristjánsdóttir, Berglind Rós Ágústsdóttir og Amanda Andradóttir eru komnar, hin danska Lise Dissing, Sandra Sigurðardóttir ætlar að berjast um markmannsstöðuna og þá eru þær Fanndís Friðriksdóttir (eftir barnsburð) og Guðrún Elísabet Björgvinsdóttir (meiðsli) að snúa aftur í liðið á síðustu vikum.
Bestu leikmenn
1. Bryndís Arna Níelsdóttir (Valur)
Það er unun af því að fylgjast með leikmanni með eins mikið geislandi sjálfstraust og Bryndís Arna. Hún hefur alltaf trú á að hún geti skorað mark. Hún náði tveimur í dag.
2. Þórdís Elva Ágústsdóttir (Valur)
Þórdís Elva og Bryndís ná einkar vel í spilinu fram á við hjá Val. Þær voru auðvitað saman hjá Fylki áður og þekkja hvora aðra út og inn. Það er alltaf hætta þegar Þórdís Elva skýtur að marki og eitt þeirra fór inn í dag.
Atvikið
Töfrabrögðin hjá Bryndísi Örnu eftir stundarfjórðung var uppáhalds atvikið mitt í leiknum. Hún tók þá Zidane snúning úti á miðjum velli, brunaði í átt að marki, tók þríhyrning við Þórdísi Elvu og þrumaði að marki. Því miður framhjá en þetta hefði orðið mark sumarsins.
Hvað þýða úrslitin?
Valur endurheimtir toppsætið og með svona lið er ljóst að það verður þrautin þyngri að reyna að ná því af þeim aftur. ÍBV þarf að ná þessum leik úr sér og gleyma honum enda nóg framundan í fallbaráttunni.
Vondur dagur
Mér fannst Guðný í markinu stundum frekar óörugg og ljóst að sérstaklega fyrstu tvö mörkin skrifast svolítið á hana að halda ekki boltanum.
Dómarinn - 7
Sleppti því að dæma á eina frekar harkalega tæklingu sem hefði líklega átt að spjalda á, en lét hagnað þess í stað ráða. Að öðru leiti flott frammistaða hjá Guðgeiri og hans teymi.