SKÝRSLAN: Valsarar halda toppsætinu
Hvað réði úrslitum?
Valsarar fóru betur með færin sín í þessum leik. Hvorugt liðið óð í færum og þá er heldur betur nauðsynlegt að nýta þau.
Bestu leikmenn
1. Þórdís Elva Ágústsdóttir
Ég hef sagt það áður og mun líklega segja það aftur en Þórdís Elva skilar alltaf sínu þegar hún stígur inn á fótboltavöll. Hún er svo fáránlega seig og svo eru mörk í henni líka eins og hún sýndi í dag.
2. Amanda Jacobsen Andradóttir
Ég hefði alveg getað valið einhvern annan í þennan reit sem spilaði meira en Amanda átti svo góða innkomu að ég vel hana. Ekki að ástæðulausu að þessi leikmaður var ung valin í landsliðið en það leka af henni gæði. Gjörsamlega sprengdi upp leikinn og gaf stoðsendingu eftir geggjað spil við Ásdísi Karen.
Atvikið
Jöfnunarmark Valsara veitti þeim byr undir báða vængi. Stuttu eftir markið gerðu Valsarar svo skiptingu þar sem Amanda kom inn á og hún átti frábæra innkomu og sprengdi leikinn upp. Þær lágu á Þrótturunum næstu mínútur eftir það og uppskáru sigurmarkið.
Hvað þýða úrslitin?
Valsarar halda sínu striki og halda toppsætinu. Þær eru áfram með tveggja stiga forskot á Blika sem sitja í öðru sæti en þessi lið eru aðeins að stinga af eins og staðan er í dag. Þróttur er áfram í 3. sæti með 24 stig, 8 stigum frá Völsurum.
Vondur dagur
Ásdís Karen átti aðeins erfitt uppdráttar og það virtist lítið vera að ganga hjá henni í leiknum en svo kemur hún að báðum mörkum Vals í leiknum þannig hún stóð alveg fyrir sínu þannig séð. Annar leikmaður sem er líklega frekar ósátt eftir daginn er Katla Tryggvadóttir. Venjulega dregur hún mikið til sín og er áberandi en hún náði alls ekki takti við leikinn í dag.
Dómarinn - 8
Mér fannst Helgi Mikael og hans teymi heilt yfir flott í dag. Ekki erfiður leikur að dæma og hann hélt góðu flæði. Alltaf eitthvað sem hægt er að pikka út, gult spjald sem fór ekki á loft og þess laga en yfir það heila ekkert mikið sem ég hef til að kvarta yfir.