SKÝRSLAN: Markaveisla á Kópavogsvelli
Hvað réði úrslitum?
Karakterinn í Blikunum í seinni hálfleik var rosalegur. Algerlega svart og hvítt fyrri og síðari hálfleikur Blika og þær skoruðu tvisvar sinnum tvö mörk með skömmu millibili sem drap leikinn fyrir Þór/KA. En betra liðið vann. Síðan má ekki gleyma innkomu Hafrúnar í vinstri bakvörðin í seinni hálfleik, var gjörsamlega sturluð.
Bestu leikmenn
1. Linli Tu
Skoraði þessi fyrstu tvö mörk sem opnaði þessar flóðgáttir fyrir Breiðablik og var gjörsamlega sturluð í dag. Núna er ég ekki að velja hana bara því hún skoraði tvö mörk. Ég horfði á allan leikinn og varnarmenn Þór/KA áttu í stökustu vandræðum með hana í dag. Geggjuð kaup að mínu mati hjá Breiðablik.
2. Agla María Albertsdóttir
Átti stórleik í dag. Ógnaði sífellt með krafta sínum og hraða og skapaði langflestu færin í þessum leik. Leggur einnig upp tvö mörk og maður sá að allt fór einhvernveginn í gegnum hana í seinni hálfleik. Hún á mjög stóran þátt í öllum mörkum Breiðabliks í dag. Þvílíkur leikmaður og litla snilldin fyrir Breiðablik að eiga hana bara í vopnabúrinu.
Atvikið
Það er mjög erfitt að velja eitthvað eitt atvik en ég ætla að segja fjórða mark Blika. Akureyringarnir voru alveg ennþá inni í þessum leik þegar Blikarnir komust aftur yfir í 3-2 en síðan stuttu seinna klárast þessi leikur bara þegar Blikarnir gera út um leikinn með þessu fjórða marki.
Hvað þýða úrslitin?
Breiðablik fara á toppinn tímabundið, nema Valur tapar fyrir Stjörnunni á Miðvikudaginn. Þór/KA hinsvegar sitja eftir í fjórða sætinu.
Vondur dagur
Kannski leiðinlegt svar en mér fannst engin eiga eittvað slæman dag. Gæði Blika fram á við er bara gífurlega mikil og skiljanlega réðu Þór/KA illa við það. Kannski fullmikið af mistökum í vörninni og léleg dekkning í föstum leikatriðum. Ég held að vondur dagur fer bara á þá sem komu ekki á þennan leik. Gjörsamleg veisla frá upphafi til enda.
Dómarinn - 7
Var bara mjög flottur í dag. Ekkert mikið af stórum ákvörðunum sem hann þurfti að taka en hann nelgdi þær allar að mínu mati.