Þá ganga liðin til vallar og takast í hendur áður en leikurinn byrjar.

Styttist í þetta! Þá ganga liðin til búningsherbergja og gera sig klár í slaginn!

Byrjunarliðin klár! Þá eru byrjunarliðin komin í hús og Ási gerir fjórar breytingar á Blikaliðinu frá sigrinum gegn Selfossi á dögunum. Út úr liðinu fara Toni Deion Pressley, Hafrún Rakel, Andrea Rut og Birta Georgsdóttir. Inn fyrir þær koma Áslaug Munda, Clara Sig, Linli Tu og Vigdís Lilja.

Jóhann Kristinn gerir þá einungis tvær breytingar á liðinu sínu frá sigrinum góða gegn FH á dögunum en þær Tahnai Lauren og Agnes Birta koma inn í liðið fyrir Karen Maríu og Kimberley Dóru. Það vekur strax athygli að Karen María er ekki í hóp hjá Þór/KA í dag.

Fyrri viðureignir liðanna Samkvæmt ksi.is hafa liðin mæst 63 sinnum en Blikakonur hafa unnið flestu leikina. Blikakonur hafa unnið 60% af leikjunum en markatalan í þessum viðureignum er 173-77 Breiðablik í vil. Fyrri leikur liðanna á þessu tímabili fór 2-0 fyrir Þór/KA en sá leikur var spilaður inni í Boganum.

Fyrri viðureignir liðanna:
Breiðablik sigrar: 38 (60%)
Jafntefli: 8 (13%)
Þór/KA sigrar: 17 (27%)
Markatala: 173 - 77 Breiðablik í vil

Dómaratríóið Aðalbjörn Heiðar Þorsteinsson mun sjá um að dæma þennan leik en þeir Nour Natan Ninir og Patryk Emanuel Jurczak halda utan um flöggin í dag. Ólafur Ingi Guðmundsson verður eftirlitsmaður KSÍ í dag en varadómarinn í dag að þessu sinni er hann Kristján Már Ólafs.

Akureyringar að gera gott mót Þór/KA hafa verið öflugar í sumar og unnið nokkra leiki gegn stóru liðunum en þær hafa hinsvegar líka tapað niður stigum gegn þessum verri liðum. Akureyringarnir unnu gegn Blikunum í fyrri viðureigninni. Þór/KA hafa gefið okkur oftar en ekki mjög leiðinlega leiki þegar þær spila á útivöllum. Í 6 útileikjum hafa þær unnið fjóra leiki, tapað tveimur en eru með markatöluna 5-3. Í 6 leikjum! Vonandi fáum við aðeins fleiri mörk í þennan leik en við höfum fengið í seinustu útileikjum hjá Akureyringunum.
Þór/KA unnu seinasti leikinn sinn í deildinni gegn mjög góðu FH liði í Krikanum. Leikurinn fór 1-0 fyrir Akureyringunum en það var Karen María sem skoraði sigurmarkið. Fáum við annan iðnaðarsigur í dag frá Þór/KA?

Blikakonur í harðri baráttu Breiðablik eru, eins og staðan er í dag, í öðru sæti á eftir Valskonum þegar þessi 13. umferð fer af stað. Það munar aðeins tveimur stigum á Breiðablik og Val þannig með sigri fara Blikarnir tímabundið á toppinn. Lífsnauðsynlegur leikur fyrir Breiðablik en þar sem Valskonur eiga Stjörnuna í næsta leik er alveg ágætis möguleiki á því að Breiðablik verði á toppnum í lok umferðarinnar.

Það geta auðvitað allir unnið alla í þessari deild og þess vegna er það mikilvægt fyrir lið eins og Breiðablik að vinna þessa stórleiki á heimavelli. Breiðblik hafa skorað flestu mörkin í deildinni, 34 í 14 leikjum. Markahæsti leikmaður Blika er Agla María Albertsdóttir með 6 mörk. Síðan koma þær Katrín Ásbjörnsdóttir með 5 mörk, Linli Tu með 5 mörk og Andrea Rut Bjarnadóttir einnig með 5 mörk.

Stórleikur á frídegi verslunarmanna! Heilir og sælir ágætu lesendur og verið hjartanlega velkomin í þráðbeina textalýsingu frá leik Breiðabliks og Þór/KA í Bestu deild kvenna. Leikurinn tilheyrir 13. umferðinni en þetta er fyrsti leikur 13. umferðarinnar.