SKÝRSLAN: Einstefna sem skilaði bara einu stigi
Hvað réði úrslitum?
Á endanum er það í raun einfalt svar: Það er blanda af færanýtingu Þróttar og markvörslu Guðnýjar Geirsdóttur. Þróttarar voru með algjöra yfirburði en nýttu það ekki.
Bestu leikmenn
1. Guðný Geirsdóttir (ÍBV)
Frammistaða í hæsta klassa hjá markverðinum. Varði stórkostlega í seinni hálfleiknum til að bjarga stiginu. Elskar að spila á móti Þrótti.
2. Katla Tryggvadóttir (Þróttur R.)
Hún og Katie Cousins voru bestu leikmenn Þróttar í leiknum. Katla skoraði gott mark og sýndi flotta takta.
Atvikið
Guðný átti tvær rosalegar vörslur í seinni hálfleiknum sem kórónuðu frábæran leik hennar.
Hvað þýða úrslitin?
ÍBV nær í stig en Keflavík nær líka í stig í kvöld - Vestmanneyingar eru því með jafnmörg stig og lið í fallsæti - og fallbaráttan er áfram gríðarlega spennandi. Þróttarar eru búnar að missa af efstu tveimur sætunum, það er nokkuð ljóst, en þær eru í þriðja sæti áfram.
Vondur dagur
Færanýting Þróttar var afar slök í kvöld. Freyja Karín Þorvarðardóttir átti því miður ekki góðan dag fyrir framan markið en hún klúðraði besta færi leiksins í seinni hálfleiknum. Fyrirgjafir Þróttar voru oft á tíðum líka lélegar og höfnuðu oftar en ekki í fanginu á Guðnýju.
Dómarinn - 6,5
Ágætis leikur hjá dómarateyminu, en að mínu mati hefðu getað verið fleiri gul spjöld í leiknum. Það var til að mynda mikið sparkað í Katie Cousins og það hefði mátt spjalda fyrir það. Eyjakonur voru harðar í horn að taka.