SKÝRSLAN: Flautumark frá 2006 módeli
Hvað réði úrslitum?
Þórsarar voru betra liðið stærri hluta leiksins í leiknum, leikplanið að ganga fullkomlega upp. En á tæplega hálftíma kafla gat liðið ekki neitt og Ægir kom til baka og jafnaði í 2-2. Í 2-2 var algjör borðtennisleikur í gangi og sigurinn fyrir framan bæði lið til að grípa hann. Ægir þurfti sigurinn meira en Þór í dag og tók meiri sénsa í lokin. Það kostaði heimamenn í lokin og nýtti hinn sautján ára gamli Nökkvi Hjörvarsson plássið sem hann fékk í lokin, náði skoti að marki, var heppinn og boltinn fór í netið.
Bestu leikmenn
1. Dimitrije Cokic
Var virkilega góður inn á miðsvæðinu eftir að Ægir skipti um kerfi, umferðarstjóri þegar Ægir átti sókn eftir sókn.
2. Kristófer Kristjánsson
Frábær sprettur í fyrsta marki leiksins sem kemur Þórsurum á bragðið. Gífurlegur hraði í Kristófer sem átti heilt yfir fínan leik. Akseli Kalermo var einnig öflugur hjá Þórsurum og Vilhelm í vinstri bakverðinum var líka góður.
Atvikið
Sigurmarkið trompar einhver vítaköll. 2006 módel að skora sitt fyrsta mark og tryggja liðinu sínu sigur. Augnablik sem hann mun aldrei gleyma.
Hvað þýða úrslitin?
Ægir er svo gott sem fallinn úr deildinni en Þórsarar eiga að geta horft upp á við eftir þennan fyrsta útisigur sinn í sumar. Þór er þremur stigum frá umspilssæti sem stendur og Ægir er sjö stigum frá öruggu sæti þegar sex umferðir eru eftir. Lið í kring eiga þó einnig leik til góða.
Vondur dagur
Braima Cande átti erfiðan dag, missir af Kristófer í fyrsta markinu og meiðist. Fór út af í 0-2. Bjarki Þór Viðarsson átti í brasi í leiknum fannst mér og skoraði sjálfsmark, annað atvik þar sem Cristofer Rolin, sem er reyndar skepna af burðum, rölti framhjá honum og Akseli þurfti að henda sér fyrir til að bjarga liðsfélaganum.
Dómarinn - 3,5
Sumt sem ég fílaði við línuna sem Þórður reyndi að halda, leyfði leiknum að fljóta og sleppt því að dæma á tittlingaskít. Þegar hann samt svo dæmdi á slík atvik þá var það mjög skrítið og drap aðeins stemninguna fyrir því að leyfa leiknum að fljóta í hin skiptin. Vítaatvikin þrjú eru svo öll vafasöm. Í fyrsta atvikinu bendir hann á punktinn en ákveður svo, mögulega með ábendingu frá AD2, að færa leikbrot út fyrir teig. Það var röng ákvörðun, vítið sem Ægir svo fékk í seinni hálfleik er mjög ódýrt en vissulega snerting. Það væru 4 víti í leik ef þetta á að vera víti. Loks gerðu Ægismenn tilkall til vítaspyrnu í uppbótartíma og ég hvet lesendur til að skoða atvikið sem finna má í viðtalinu við svekktan aðstoðarþjálfara Ægis. Þar er einhver snerting sýnist mér en dómarinn er frábærlega staðsettur og ég get ekki verið 100% á að það sé víti.