SKÝRSLAN: Evrópuævintýri KA lýkur í Laugardalnum
Hvað réði úrslitum?
Club Brugge er bara með allt of mikil gæði fyrir íslenskt lið að keppa við. KA varðist vel á löngum köflum en belgíska liðið náði samt að skora með gæðunum sínum.
Bestu leikmenn
1. Steinþór Már Auðunsson
Eins og í síðasta leik nenni ég lítið að skrifa um hverjir voru góðir hjá Club Brugge og vil frekar tala um KA mennina sem stóðu sig vel. Stubbur var frábær í markinu þrátt fyrir að fá á sig 5 mörk. Hann átti fullt af geggjuðum vörslum í einn á einn stöðum og frá stuttu færi.
2. Pætur Petersen
Pætur fær þetta fyrir þetta frábæra mark sem hann skorar en einnig var hann öflugur í þau skipti sem KA náði eitthvað að sækja. Hann var orðinn helvíti þreyttur í endan en maður fyrirgefur honum það.
Atvikið
Annað mark Club Brugge kom á vondum tíma. Þetta var eiginlega bara flautumark eftir að KA hafði varist vel allan fyrri hálfleikinn þá kemur bara sleggja sem er úr efsta gæðaflokki.
Hvað þýða úrslitin?
Evrópu ævintýri KA er lokið í sumar og þá einbeita þeir sér að öðru. Club Brugge mun mæta Osasuna í næstu umferð.
Vondur dagur
Jóan Edmundsson verður örugglega pirraður út í sjálfan sig að hafa fengið annað gula spjaldið á lokamínútu leiksins. Það var frekar soft dómur en samt óþarfi hjá Jóan.
Dómarinn - 7
Lítið af stórum dómum í þessum leik, maður tók ekki oft mikið eftir dómarateyminu frá Ítalíu. Mér fannst þeir hinsvegar getað sleppt rauða spjaldinu og svo var eitt skipti í fyrri hálfleik þar sem Pætur var sloppinn í gegn í frábæra sókn en í staðin fyrir að beita hagnaði þá flautaði dómarinn og gaf KA aukaspyrnu.