SKÝRSLAN: FH-ingar jöfnuðu á svakalegum lokamínútum
Hvað réði úrslitum?
FH var meira með boltan og átti miklu fleiri skot en þeir fóru illa með sín færi og stöðurnar sem þeir komu sér í. Þar af leiðandi tókst HK að komast aftur inn í leikinn með góðum skyndisóknum.
Bestu leikmenn
1. Anton Søjberg (HK)
Tveggja marka maður í sínum öðrum byrjunarliðsleik í nýju landi. Hann var virkilega flottur í dag og flest allt sem kom út úr HK liðinu sóknarlega var eitthvað tengt honum.
2. Arnar Freyr Ólafsson (HK)
Arnar hélt HK í leiknum með nokkrum mjög góðum vörslum. Ef ekki heðfi verið fyrir hann hefði FH klárað þennan leik í fyrri hálfleik.
Atvikið
Gyrðir Hrafn fær gult spjald fyrir dýfu inn í teig á 94. mínútu í stöðunni 2-2. Það var ómögulegt fyrir mig í mínu sæti að segja til um hvort dómurinn hafi verið réttur eða ekki en það verður áhugavert að sjá endursýningar af þessu.
Hvað þýða úrslitin?
HK er ennþá í 7. sæti 4 stigum á eftir þéttum pakka þar sem Stjarnan, FH og KR eru öll jöfn á stigum í 4. - 6. sæti.
Vondur dagur
FH-ingar í og nálægt vítateignum voru ekki alveg nógu skarpir. Þeir voru að koma sér í fullt af góðum stöðum og skapa fín færi en þeir voru mikið í því að skjóta af snemma eða missa boltan við að dvelja of lengi á honum.
Dómarinn - 8
Einkunin veltur svolítið á þessu gula spjaldi á Gyrði en ef það var rétt þá átti Jóhann Ingi og hans teyma bara virkilega góðan leik.