Flottur sigur hjá Val. FH gaf þeim alvöru leik og þær voru líklegri í byrjun seinni hálfleiks, en Íslandsmeistararnir taka þessi þrjú stig með sér inn í landsleikjahléið.

Valur að ógna áfram! Amanda með stórhættulega hornspyrnu sem Berglind Rós nær að skalla á markið en Aldís ver.

Valur í stórhættulegri skyndisókn og Fanndís gerir allt rétt. Hún kemur boltanum yfir á fjærstöngina þar sem Guðrún Elísabet er alein en Aldís sér við henni.

Ísabella skorar upp úr þurru en er dæmd rangstæð.

Það birtir aftur til á Hlíðarenda.

Alma fær boltann við teiginn og reynir skot en það fer yfir markið. Nær FH að skora jöfnunarmark?

Erla með slæma sendingu sem Fanndís kemst inn í. Hún horfir strax á markið og reynir skot af einhverjum 40 metrum. Ekkert mál fyrir Aldísi að grípa boltann.

Í algjöru dauðafæri eftir að boltinn hrekkur til hennar, en hún setur hann framhjá markinu.

Laura Frank í dauðafæri að gera þriðja mark Vals en Aldís gerir vel í því að verja frá henni. Hún heldur FH inni í leiknum.

Alma reynir skot fyrir utan teig en Þórdís Elva gerir vel í því að koma sér fyrir boltann.

Lise Dissing í besta færi Vals í seinni hálfleik en setur boltann yfir markið!

FH nær að koma boltanum frá en sókn Vals heldur áfram eftir hornspyrnuna. Lise Dissing fær boltann úti vinstra megin og reynir fyrirgjöf en hún endar hjá Aldísi.

Valur að vinna hornspyrnu. Aðeins betra hjá heimakonum þessar síðustu mínútur.

Berglind Rós og Fanndís eru að koma inn á af bekknum hjá Íslandsmeisturunum.

Það liggur mark í loftinu hjá FH-ingum.

Hildigunnur Ýr með skot rétt framhjá eftir flotta sókn! Þarna munaði litlu!

Andrea Marý reynir skot af löngu færi en það er auðvelt viðureignar fyrir Fanneyju.

Harpa með fínan bolta inn á teiginn en Arna Sif kemur honum frá. FH verið sterkari aðilinn í seinni hálfleiknum.

Arna Sif skallar boltann frá og Amanda kemur honum svo í innkast.

Margrét Brynja vinnur hornspyrnu fyrir FH. Ég held að þetta hafi verið rangstaða í aðdragandanum en flaggið fór ekki á loft.

Mackenzie með fínt skot sem fer rétt framhjá markinu.

Shaina með flottan bolta inn á teiginn en Valskonur ná að koma boltanum í burtu.

Fyrsta hornspyrnan í leiknum. FH á hana.

Ásdís Karen þræðir Amöndu í gegn en Aldís sér við henni og á góða vörslu.

Það er ansi kuldalegt á Hlíðarenda. Það er byrja að hellirigna en voanndi fáum við góðan fótbolta hér í seinni hálfleiknum.

Engu bætt við fyrri hálfleikinn. Staðan er jöfn og það er líklega bara sanngjarnt.

Lise Dissing með fínan sprett og reynir fyrirgjöf en hún fer af varnarmanni og í hendurnar á Aldísi.

Mackenzie með fína tilraun sem svífur fram hjá markinu.

Það er orðið mjög dimmt yfir á Hlíðarenda, mjög rigningarlegt.

Lise Dissing við það að sleppa í gegn en Colleen Kennedy gerir frábærlega varnarlega og vinnur markspyrnu fyrir FH.

Amanda í fínu skotfæri á teignum og hún nær að láta vaða, en Rachel Avant kemur sér fyrir skotið.

Ásdís Karen reynir að þræða Bryndísi í gegn en sendingin er ónákvæm og föst.

Shaina með skot af löngu færi en það fer langt yfir markið. FH-ingar hafa verið líklegri aðilinn í þessum leik hingað til.

Loksins merki um líf í þessum leik. Búið að vera vægast sagt ömurlegt áhorfs en Hildigunnur lífgaði aðeins upp á þetta þarna.

Hildigunnur fær boltann við vítateigsbogann, með frábæra hreyfingu og leikur á varnarmenn Vals. Hún á svo skot sem fer yfir Fanneyju og í slánna. Þarna mátti minnstu muna að gestirnir myndu taka forystuna.

Colleen Kennedy missir boltann þegar hún tekur innkast og ólöglegt innkast dæmt. Svolítið súmmerar þennan leik upp hingað til.

Amanda með stórhættulega aukaspyrnu inn á teig FH-inga en gestirnir ná með herkjum að koma boltanum frá marki sínu.

Margrét Brynja með ágætis skottilraun fyrir utan teig sem fer rétt fram hjá markinu.

Fanney með slakt útspark og úr því fær FH hættulega sókn, en Mackenzie er flögguð rangstæð.

Þessar fyrstu 15 mínútur hafa verið afskaplega rólegar, lítið að frétta.

Það er bara frekar vel mætt á völlinn hér í dag. Fólk komið að sjá Íslandsmeistarana gegn spútnikliðinu.

FH getur ekki stillt upp varnarmönnunum Örnu Eiríksdóttur og Lillý Rut Hlynsdóttur í dag þar sem þær eru í láni frá Val. Arna var nýverið valin í A-landsliðið.

Amanda komin í fínt skotfæri við vítateigslínuna en nær engum krafti í skotið sem fer fram hjá markinu.

Snædís María í ágætis færi nálægt markinu en setur boltann í hliðarnetið.

Þetta er farið af stað!

FH stendur heiðursvörð fyrir Íslandsmeistara Vals fyrir leikinn.

Við fengum Elízu Gígju Ómarsdóttur, leikmann Víkings og fréttaritara Fótbolta.net, til að spá í leiki umferðarinnar. Hún spáir Val 3-1 sigri hér í dag. Eftir nokkuð slaka frammistöðu Vals á móti Stjörnunni mæta þær aftur í gír og sýna af hverju þær eru besta lið landsins. Amanda leikur listir sínar eins og hún er búin að gera síðan hún kom, skorar eitt og leggur upp á Bryndísi, Þórdís setur svo eitt út langskoti. FH uppsker eitt mark úr hápressunni sem þær eru búnar að fullkomna en það dugir ekki til.

Valskonur hafa unnið báða leiki þessara lið til þessa á tímabilinu, 2-0 hér á Hlíðarenda og 2-3 í Kaplakrika.

Sama hvernig fer í þessum lokaleikjum, þá hefur FH átt mjög gott tímabil. Liðinu var fyrir tímabilið spáð neðsta sæti en náði að tryggja sig í efri hluta deildarinnar. Fyrir þennan leik er FH í sjötta sæti með 28 stig.

Fyrir leikinn er það orðið ljóst að Valur er Íslandsmeistari en þær eru með tíu stiga forskot á Stjörnuna þegar þrír leikir eru eftir af tímabilinu.

Og verið velkomin í beina textalýsingu frá leik Vals og FH í efri hluta Bestu deildar kvenna.