SKÝRSLAN: 167 daga bið á enda hjá Keflavík
Hvað réði úrslitum?
Keflavík skapaði fleiri og betri hættuleg færi og varðist betur þegar á reyndi. Færin voru kannski ekki á færibandi en þau komu og þeir nýttu þau. Á sama tíma gekk HK illa að finna lausnir á öguðum varnarleik Keflvíkinga sem voru duglegir að hlaupa og loka svæðum.
Bestu leikmenn
1. Sami Kamel
Væri Keflavík í betri stöðu ef hann hefði náð fleiri leikjum í sumar? Yfirburðar fótboltamaður í liðinu og algjör lykilhlekkur í sóknarleik þeirra. Átti fínan leik og skoraði gott mark
2. Nacho Heras
Fær þetta fyrir að fiska og skora úr víti en annars er þetta tileinkað varnarlínunni sem heild sem reyndist ókleifur múr fyrir lið HK að mestu.
Atvikið
Á 81. mínútu leiksins braut Gunnlaugur Fannar Guðmundsson á Örvari Eggertssyni, boltinn barst til Tuma Þorvarssonar sem var einn gegn Mathiasi í marki Keflavíkur þegar Arnar Þór dómari leiksins flautar á brotið og stöðvar þar með leikinn og hefur marktækifærið af HK. Hefði það breytt leiknum ef Arnar hefði beitt hagnaði? Fáum aldrei svörin við því úr þessu.
Hvað þýða úrslitin?
Keflavík fer í 15 stig í neðsta sæti deildarinnar og er sex stigum frá öruggu sæti. HK í 2.sæti neðri hlutans með 26 stig og á í vissri hættu með að sogast mögulega í fallbaráttu.
Vondur dagur
Örvar Eggertsson brenndi af algjöru dauðafæri í upphafi leiks og þrjátíu sekúndum síðar var dæmd vítaspyrna á HK. Vont að fara með svona klúður á koddann sem hefði mögulega geta breytt þróun leiksins gríðarlega.
Dómarinn - 3
Ég veit ekki hvað býr að baki en eftir ágæta byrjun á leiknum fannst mér Arnar Þór dómari leiksins verða stressaður á flautunni, hann barðist við að halda stjórn á leiknum og spjaldaði mann og annan á kafla í síðari hálfleik. Verra finnst mér þó atvikið sem rætt er um hér til hliðar. Hef oft séð Arnar eiga betri daga í dag og efast ekki um að hann sé betri dómari en hann að mínu mati sýndi í dag. Við eigum öll off daga í okkar vinnu eða lífinu almennt og þetta var bara einn af þessum dögum.