Þungt var það á löngum kafla en það hafðist! Áframhaldandi vera í A-deild Þjóðardeildarinnar tryggt með torsóttum en afar sætum sigri. Frekari umfjöllun og viðtöl væntanleg.

+ 3-4 Ísland á horn. Enginn inn á teiginn og engir sénsar teknir.

+ 2 Serbía sækir horn.

Uppbótartíminn er að minnsta kosti fimm mínútur.

Þung sókn frá Serbíu en okkar konur henda sér fyrir sem að markinu kemur.

Sveindís Jane jafnar leikinn! Einföld skyndisókn og vel klárað hjá Sveindísi! ???????? pic.twitter.com/ySs1mQTTm3

— RÚV Íþróttir (@ruvithrottir) February 27, 2024

Mikill darraðardans í teig Íslands og Serbi fer niður í baráttu við varnarmann. Hjartað tekur aukaslag þegar dómarinn flautar en niðurstaðan brot á Serbíu og aukaspyrna.

Nina Matejic að vinna sig í skotfæri í teig Íslands en setur boltann framhjá markinu.

Íslenska liðið sannarlega fengið blóð á tennurnar við þetta mark og pressar nú grimmt.

Hildur Antonsdóttir í dauðafæri á markteig en Milica ver vel. Kemur vel út á móti og þrengir skotið fyrir Hildi.

Íslenska liðinu gengið illa að skapa sér nokkuð gegn þessu vel skipulagða liði Serbíu. Gestirnir taka sér langan tíma í allar aðgerðir og hafa náð að hægja verulega á öllu flæði í leiknum.

Af endursýningum að dæma virðist sem um klára hendi hafi verið að ræða í atvikinu áðan. Ekkert VAR hér í boði svo þar við situr.

Sveindís Jane með boltann fyrir markið sem virðist vera fara í hönd varnarmanns. Sú spænska ekki á sama máli og ísland fær að endingu horn sem ekkert verður úr.

Sædís með ágætis bolta fyrir markið úr aukaspyrnu en okkur tekst ekki að gera neitt úr því og boltinn í markspyrnu.

Karólína í óvæntu skotfæri í teignum en setur boltann vel framhjá markinu.

Langt innkast Sveindísar skilar hornspyrnu. Guðrún Arnardóttir fyrst á boltann eftir hornið en nær ekki að stýra honum á markið.

Stórhætta í teig Serba eftir varnarmistök. Sveindís við það að setja boltann í netið af markteig þegar Serbar koma boltanum í horn. Upp úr horninu kemur ekkert.

Ekki að sjá að neinar breytingar hafi verið gerðar á liðsskipan í hálfleik Ísland hefur leik í þessum síðari hálfleik. 45 mínútur sem þarf að nýta vel eða falla í B-deild.

Þessum fyrri hálfleik er hér með lokið og það eru Serbar eins og staðan er sem eru á leið í A-deild á kostnað Íslands. Margt sem þarf að skoða og laga í hálfleik og það er vonandi að stelpurnar og Steini finni þær lausnir sem þarf ef ekki á illa að fara í dag.

Uppbótartími fyrri hálfleiks er að minnsta kosti þrjár mínútur. Ísland á horn.

Innkast frá Sveindísi inn á teiginn sem Hlín flikkar í átt að marki. Boltinn í fangi Milica.

Í fyrsta sinn fáum við langt innkast frá Sveindísi. Þær serbnesku skalla frá.

Rólegt yfir þessu þessa stundina. En Serbum líður vissulega ágætlega og við erum lítið að ógna.

Milica Kostic er sest á völlinn og þarf aðhlynningu. Báðir þjálfarar grípa tækifærið og kalla til liðsfund.

Milica í allskonar basli í teig Serba og missir boltann fyrir fætur Karólínu. Sleppur með skrekkin að hafa misst boltann afturfyrir í horn.

Skyndisókn Íslands. Hlín úti til hægri finnur Karólínu inn á teignum sem á skot í varnarmann. Frákastið berst á Sveindísi sem er alein við vinstra markteigshorn en hittir ekki markið. Þarna verðum við að gera betur.

Vinnum boltann hátt á vellinum og kemst Ólöf i fína stöðu úti vinstra megin. Hún leggur boltanbn inn á teiginn þar sem að Karólína mætir en setur boltann framhjá markinu frá vítapunkti.

Ísland með aukaspyrnu úti hægra megin í fínni stöðu til fyrirgjafar. Vindurinn feykir boltanum yfir allt og alla og í innkast hinu megin.

Liðið mikið að reyna að finna Sveindísi úti á vinstri vængnum en það hefir lítið gefið af sér hingað til. Serbar vel þéttir og nær alltaf mættar tvær í Sveindísi um leið og hún fær boltann.

Ágæt sókn Íslands. Boltinn færður frá hægri yfir til vinstri þar sem Sædís mætir að vítateig og á skot. Boltinn hátt yfir markið þó.

Cankovic með fínustu skottilraun sem Telma gerir vel í að slá í horn.

Serbía sækir aukaspyrnu á stórhættumlegum stað. Við hægra vítateigshorn.

Ágætt spil á hægri væng Íslands. Hlín finnur Hildi Antonsdóttur í svæði í teignum en skot hennar máttlaust og veldur Milica í marki Serba engum vandræðum.

Allegra Poljak fer hér alltof auðveldlega framhjá Sædísi á vægnum og kemst inn að vítateig. Sædís vinnur þó vel til baka og þvingar þá serbnesku í að setja boltann afturfyrir.

Liðin að þreifa fyrir sér í upphafi. Serbar þó ákveðnari hér í blábyrjun ef eitthvað er.

Hin spænska Marta Huerta De Aza er með flautuna á Kópavogsvelli í dag með þær Eliana Fernández González og Rita Cabanero eru henni til aðstoðar. En allar eru þær spænskar.

Þetta er farið af stað. Það er Serbía sem hefur hér leik og sækir i átt að Sporthúsinu.

Framundan formlegheit og þjóðsöngvar, 90 minútur eða meira af fótbolta og vonandi íslenskur sigur.

Tvær breytingar eru á byrjunarliði Íslands fyrir seinni leikinn gegn Serbíu í umspili Þjóðadeildarinnar. Leikurinn hefst klukkan 14:30 og fer fram á Kópavogsvelli. Með sigri heldur Ísland sér í A-deild Þjóðadeildarinnar en það eykur möguleikana á því að liðið komist á næsta stórmót.

?? Leikdagur!

???????? Ísland mætir Serbíu á Kópavogsvelli í seinni leik liðanna í umspili Þjóðadeildar UEFA.

???? Miðasala á https://t.co/iwyH4UEb7x!

???? https://t.co/CdvZpdnwz4

???? We play Serbia today in the 2nd leg of the UEFA Nations League Playoffs.#dottir pic.twitter.com/B8vckMYy91

— Knattspyrnusambandið (@footballiceland) February 27, 2024

Það er febrúar og það verður kalt svo mikið er víst. Veðurspáin gerir ráð fyrir að hiti verði um tvær gráður, vindur um 9m/s en hann ætti að hanga þurr á meðan á leik stendur. Tilvalið að leyfa sér að hætta fyrr í vinnu á þriðjudegi ef möguleiki er á og skella sér á völlin.

Sædís Rún Heiðarsdóttir var í viðtali við Fótbolta.net fyrir leikinn. „Þetta eru tveir leikir sem við þurfum að klára og fyrri leikurinn er búinn. Við erum staðráðnar í því að eiga góðan dag," En hvað þarf að gera öðruvísi núna til að vinna Serbana? „Við þurfum að vera aðeins rólegri á boltanum og þora að halda í hann. Þetta var mikið basl í síðasta leik við eigum nóg inni. Við getum unnið öll lið á okkar degi og þetta er klárlega eitt af þeim. En við þurfum að hafa fyrir því."

„Við viljum náttúrulega bæta ýmsa hluti," sagði Þorsteinn Halldórsson, landsliðsþjálfari, á fréttamannafundi í gær. „Við viljum vera beinskeyttari með boltann og við þurfum að halda betur í hann þegar við erum komin ofar á völlinn með hann. Við þurfum að búa til fleiri möguleika. Í seinni hálfleiknum úti náðum við að spila í gegnum fyrstu pressuna hjá þeim en þegar fremstu menn voru komnir með boltann, þá vorum við að tapa honum of fljótt. Við þurfum að laga það," sagði Þorsteinn. Glódís Perla Viggósdóttir, landsliðsfyrirliði, sat einnig fundinn. „Það er helst það að gera betur með boltann þegar við erum með hann. Og að sama skapi þegar við erum að verjast að gera það aðeins þéttar en við vorum að gera á tímum í leiknum úti í Serbíu. Það er algjört lykilatriði," sagði Glódís. Allar klárar Það eru allir leikmenn klárir í slaginn fyrir morgundaginn.„Þær voru allar með á æfingu í dag. Það er smá hnjask hér og þar, en þær eru nokkurn veginn allar klárar," sagði landsliðsþjálfarinn.

Liðin gerðu 1-1 jafntefli í fyrri leiknum sem fram fór á Sportski centar FSS síðastliðinn föstudag. Tijana Filipovic kom heimakonum yfir á 19. mínútu leiksins en Alexandra Jóhannsdóttir jafnaði fyrir Ísland fjórum mínútum síðar og þar við sat. Lýsingu Fótbolta.net frá leiknum ásamt viðtölum má finna hér. Skiljanlega ætlaði lið Íslands sér meira en að koma heim í seinni leikinn með jafna stöðu: Þorsteinn Halldórsson þjálfari liðsins var til viðtals eftir leik í Serbíu og sagði meðal annars. „Við þurfum bara að vera klár á þriðjudaginn. Þetta snýst ekki um neitt annað en það. Svo þurfum við að fara yfir í rólegheitum hvað við getum gert betur og hvað við vorum að gera vel. Við þurfum að vera vel undirbúin í leikinn á þriðjudaginn sem verður hörkuleikur," Um frammistöðu liðsins í leiknum í heild sagði Þorsteinn. „Við höfum oft spilað betur og náð fleiri samleiksköflum en þetta. Það voru hlutir sem við þurftum að gera betur með boltann og við hefðum getað verið rólegri á boltanum. Það voru einfaldar sendingar að klikka. Þetta eru atriði sem við getum bætt. Við förum yfir leikinn á sunnudaginn, förum yfir það góða og það sem þarf að laga. Við verðum eins vel undirbúin og hægt er á þriðjudaginn."

Vallarmál landsliða Íslands eru því miður í algjörum ólestri og þyngra en tárum taki að jafn mikilvægur leikur og fer í hönd geti ekki farið fram á þjóðarleikvangi okkar Laugardalsvelli. Það er hins vegar öllu lengri og þyngri umræða en ég ætla mér út í hér. Leyfi fékkst til þess að spila leikinn á Kópavogsvelli þar sem plastið er iðagrænt allt árið um kring og hiti undir vellinum. Ljósabúnaður vallarinns stenst þó ekki kröfur UEFA um aðbúnað leiksins og þarf því að leika í dagsbirtu. Niðurstaðan því að leikur hefjist klukkan 14:30. Leiðinleg staða að sjálfsögðu en við fögnum því þó að geta leikið hér á Íslandi. Glódís Perla Viggósdóttir, landsliðsfyrirliði sagði um stöðuna. „Mér finnst við ekki líta vel út sem þjóð að þetta sé það sem við höfum upp á að bjóða. Að sama skapi er ég svekkt út í UEFA að 'standardinn' sé ekki jafn hár karla- og kvennamegin; að það sé í lagi að við spilum við svona aðstæður. Að kröfurnar séu ekki þannig að það þurfi að finna völl og aðstæður sem uppfylla allar kröfur," sagði Glódís.

Heil og sæl kæru lesendur og verið hjartanlega velkomin í beina textalýsingu Fótbolta.net frá seinni leik Íslands og Serbíu í umspili um sæti í A-deild Þjóðardeildar kvenna en flautað verður til leiks á Kópavogsvelli klukkan 14:30