SKÝRSLAN: Líta bara út eins og besta lið landsins
Hvað réði úrslitum?
Breiðablik er bara á miklu betri stað en Stjarnan í dag. Voru með algjöra yfirburði nánast frá byrjun til enda og áttu þennan sigur fyllilega skilið.
Bestu leikmenn
1. Agla María Albertsdóttir (Breiðablik)
Frábær leikmaður og er enn og aftur að sýna það. Getur gert hluti sem enginn annar leikmaður í þessari deild getur gert. Skoraði eitt af mörkum tímabilsins.
2. Andrea Rut Bjarnadóttir (Breiðablik)
Er að stíga mikið upp í Blikaliðinu núna. Er með frábærar hreyfingar og það virðist alltaf vera einhver hætta í kringum hana. Það er nánast hægt að nefna alla leikmenn í sóknarlínu Breiðabliks hérna.
Atvikið
Fyrstu fimm mínúturnar í þessum leik voru með þeim ótrúlegri sem maður hefur séð. Eins og handboltaleikur en það var gaman að fylgjast með því sem hlutlaus áhorfandi.
Hvað þýða úrslitin?
Breiðablik er á toppi deildarinnar með fullt hús stiga. Þær líta út eins og besta lið landsins um þessar mundir. Stjarnan er með þrjú stig eftir fjóra leiki og það er áhyggjuefni fyrir þær bláklæddu úr Garðabænum.
Vondur dagur
Þetta er kannski ákveðið raunveruleikatékk fyrir Stjörnuna, þær þurfa að rífa sig í gang. Þetta verður líklega erfitt ár fyrir þær - allavega til að byrja með - en þessi frammistaða var eins og hjá liði sem er að fara í bullandi fallbaráttu. Það eru miklar breytingar hjá Stjörnunni og þær þurfa að finna taktinn fljótlega ef þær ætla að koma sér í efri hlutann, eins og markmiðið er. Það er ákveðin uppbygging í gangi hjá Stjörnunni eftir allar þessar breytingar en dagurinn í dag var bara frekar vondur fyrir allt liðið.
Dómarinn - 8
Dæmdi þetta bara að mestu frábærlega. Vel gert Bergrós!