SKÝRSLAN: Sorglegur endir á frábærum fótboltaleik
Hvað réði úrslitum?
Á endanum er það glórulaus vítaspyrnudómur sem réði úrslitum í þessum frábæra fótboltaleik.
Bestu leikmenn
1. Esther Rós Arnarsdóttir (Stjarnan)
Lagði gríðarlega mikla vinnu á sig í fremstu víglínu hjá Stjörnunni og skoraði markið sem kom leiknum í framlengingu. Alveg nautsterkur leikmaður sem erfitt er að ráða við.
2. Hrafnhildur Ása Halldórsdóttir (Breiðablik)
Spilaði bara rúman klukkutíma en var mjög lífleg í sóknarleik Breiðabliks og lagði upp gott mark. Var óheppin að skora ekki líka. Fædd 2006 og á framtíðina fyrir sér.
Atvikið
Þarf ekki að spyrja að því eftir þennan leik. Auðvitað vítaspyrnan sem aldrei átti að vera.
Hvað þýða úrslitin?
Breiðablik fer áfram í átta-liða úrslitin í Mjólkurbikarnum. á meðan Stjarnan situr eftir með sárt ennið.
Vondur dagur
Dómarateymið fær þetta. Að mínu mati ekkert brjálæðislega illa dæmdur leikur áður en kemur að vítaspyrnunni, en hann var ekki sérlega vel dæmdur heldur. Svo kemur þetta atvik og í svona leik má þetta bara ekki gerast. Það er bara þannig. Svo er hægt að tala um einhverja aðra mögulega vítaspyrnudóma í leiknum en þessi ákvörðun breytir allri dýnamíkinni og ræður að lokum úrslitum. Dómarar eiga ekki að gera það, fótboltinn á að ráða úrslitum.
Dómarinn - 1
Því miður. Með lélegri ákvörðunum sem maður hefur bara séð í fótbolta. Dómarateymið allt verður að gera betur í þessu atviki. Ákvörðun sem ræður úrslitum og verður til þess að Stjarnan er úr leik og Breiðablik fer áfram.