Keflvíkingar gengu á endanum á lagið manni fleiri eftir rauða spjaldið í fyrri hálfleik. Efast samt um að nokkur maður á bekknum hjá þeim hafi verið rólegur fyrr en í stöðunni 2-0 í fyrsta lagi. Réði rauða spjaldið úrslitum? Nei eflaust ekki en það hafði þó risastór áhrif á leikinn og heimamönnum auðveldara fyrir og þyngdi róðurinn mjög fyrir gestina að sama skapi.

Það er að sjálfsögðu víti og rautt á Arnar Daða í fyrri hálfleik. Efast ekki um að grasið í Keflavík hafi haft áhrif á Arnar í atvikinu og hann hafi mögulega reiknað með aðeins meiri tíma áður en Sami Kamel var mættur. Rándýrt þegar upp var staðið.

Keflavík sækir sín fyrstu stig og fer í áttunda sætið með þrjú stig. Skilja þar Aftureldingu eftir á botninum með eitt stig.

Hvernig getur maður annað en tilnefnt Arnar Daða Jóhannesson hér burtséð frá því hvort réttmætt hafi verið að reka hann út af eða ekki. Nógu vont er að fá á sig vítaspyrnu en að fá að líta rauða spjaldið á sama tíma er öllu verra.

Ég er á báðum áttum og fer hring eftir hring um hvort um réttan dóm sé að ræða eða ekki er Arnar Daði fékk rautt. Það má færa fyrir því rök að Arnar hafi reynt að leika boltanum en aðrir segja hann ekki hafa átt möguleika á boltanum. Ef ég er ekki fyllilega viss eftir að hafa horft á atvikið 100 sinnum hvernig var Gunnar Oddur viss á 5 sekúndum? Ekki það hann er vissulega í talsvert betri aðstöðu en bæði ég og myndavélin á leiknum til að sjá það sem og Smári Stefánsson aðstoðardómari. Annað atriði er hvor Mamadou Diaw hafi verið heppinn að hanga inn á vellinum er út í síðari hálfleik var komið. Þar má færa rök fyrir því að hann hafi átt að líta seinna gula og þar með rautt. Tvö stór atriði í leik sem var annars tíðindalítill hvað dómgæslu varðar. Hér einu sinni var mér sagt að það væri alltaf best að fylgja innsæinu. Við fyrstu sýn og örugglega næstu 30 enduráhorf eftir það fannst mér þetta ekki vera rautt spjald. Ég ætla að halda mig við þá skoðun og tek það á mig hafi ég rangt fyrir mér. Sem er alveg eins líklegt og hitt enda ekki dómari. Langaði samt mest að segja bara pass.