Frammistaða Vestra var glæsileg. Baráttuglaðir, beinskeyttir, héldu bolta vel og áttu flottar sóknir. Davíð Smári sagði liðið hafa sýnt allt sem eigi að einkenna Vestraliðið. Hin hlið teningsins er ójafnvægði í spilamennsku Stjörnunnar og arfadapur varnarleikur liðsins sem heild.

Nota þennan dálk í Hauk Örn Brink, nítján ára leikmann sem skoraði bæði mörk Stjörnunnar. Hans fyrstu mörk í efstu deild. Þess má geta að Haukur er sonur tónlistarmannsins Sjonna Brink sem féll frá 2011. Sjonni var einn vinsælasti tónlistarmaður landsins. Móðir Hauks er listakonan Þórunn Erna Clausen.

Vestramenn lyfta sér upp í 10 stig og taka með sér gott veganesti í kærkomið frí. Hópurinn er orðinn laskaður eftir leikjaálag og sífelld ferðalög fram og til baka frá Ísafirði. Stjörnumenn tapa öðrum leiknum í röð og hafa fengið níu mörk á sig í tveimur síðustu leikjum.

Eftir skellinn gegn Val voru umræður um að Guðmundar Kristjánssonar hefði verið svo sárt saknað í varnarleik Stjörnunnar. Hann var mættur til baka í þessum leik en varnarleikurinn var engu skárri. Allt Stjörnuliðið fer í þennan dálk fyrir að bjóða upp á þennan hrottalega varnarleik.

Vonandi er að birta til hjá þriðja liðinu, dómararnir hafa byrjað þetta mót mjög erfiðlega en Twana var flottur í dag. Stuðningsmenn Stjörnunnar voru eitthvað að láta í sér heyra en þeir voru aðallega að fá útrás fyrir pirringi yfir lélegri frammistöðu síns liðs held ég.