SKÝRSLAN: Stig á lið á Dalvík
Hvað réði úrslitum?
Heimamenn skoruðu tvö mörk í fyrri hálfleiknum en karakter gestaliðsins í bland við reynsluleysi heimamanna skilaði Gróttu tveimur mörkum og þar með stigi í hörkuleik.
Bestu leikmenn
1. Amin Guerrero
Amin var frábær í fyrri hálfleiknum þar sem hann skoraði og lagði upp. Þeir Áki voru stanslaust í hálsmálinu á varnarmönnum Gróttu og gerðu þeim erfitt fyrir.
2. Gabríel Hrannar Eyjólfsson
Skoraði fyrra mark gestanna sem kom þeim á bragðið. Skilaði góðri vinnu bæði varnar- og sóknarlega.
Atvikið
Vítaspyrnudómurinn. Heimamenn voru gríðarlega ósáttir en eftir að hafa skoðað atvikið aftur er erfitt að mótmæla dómnum frá sjónarhorni myndavélarinnar.
Hvað þýða úrslitin?
Bæði lið eru örugglega ósátt við einungis einn punkt á blað. Þetta þýðir hinsvegar að Gróttumenn eru enn taplausir og heimamenn einungis tapað einum leik af fimm sem telst gott fyrir nýliða í þessari deild.
Vondur dagur
Seinni hálfleikur heimaliðsins var ekki góður eftir frábæran fyrri hálfleik. Ætla mér ekki að taka einn eða neinn út fyrir sviga en þessi sveifla úr fyrri í seinni er ekki boðleg og hefðu gestirnir hæglega getað tekið öll stigin þrjú sem í boði voru. D/R fór mjög neðarlega eftir markið í upphafi síðari hálfleiks og virtist ætla að verja fenginn hlut í stað þessa að bæta við. Synd eftir jafn góðan hálfleik og sá fyrri var.
Dómarinn - 5
Vil ekki vera of grimmur en Gunnar Oddur átti ekki sérstakan leik. Leyfði eitt en tók fyrir annað. Línan eins og óstöðugt hjartalínurit og ánægja leikmanna beggja liða, ásamt þjálfurum, eftir því.