Breiðablik voru bara betri á flestum sviðum leiksins. Mér fannst þeir mæta út í leikinn með það hugarfar að það kæmi ekkert annað til greina en sigur. Fannst þetta þroskaðari frammistaða en þeir hafa oft á tíðum sýnt gegn HK. Þeir voru baráttuglaðir og sýndu mikil gæði. HK voru ekki tilbúnir í baráttuna.

Fyrsta mark Breiðabliks gerði það að verkum að þeir gátu mætt með annað hugarfar inn í seinni hálfleik. Gott mark hjá Jasoni en auðvitað er ákveðinn skuggi yfir markinu vegna þess að það átti ekki að standa. Höskuldur tók aukaspyrnu í aðdragandanum þar sem boltinn var ekki stöðvaður. Ætla einnig að nýta þetta til að minnast á atvikið þar sem Eiður Gauti meiðist að því er virðist nokkuð alvarlega eftir örfáar sekúndur í leiknum. Sendum kærar batakveðjur á Eið Gauta Sæbjörnsson.

Blikar eru áfram í 2. sæti þremur stigum á eftir Víkingum. HK eru með sjö stig í 10. sæti.

Mér fannst HK ekki eiga skilið neitt út úr leiknum vegna þess að þeir sýndu ekki baráttuna sem þurfti að sýna til að vinna leikinn. Fengu til að mynda ekki gult spjald í dag sem segir sitt.

Ívar gerir sig sekan um afdrifarík mistök þegar hann leyfir fyrsta markinu að standa. Boltinn var á hreyfingu þegar aukaspyrnan var tekin og það er enginn spurning um það.