SKÝRSLAN: Frjálst fall í fyrri hjá Leikni gegn Keflavík
Hvað réði úrslitum?
Arfaslakur varnarleikur Leiknis í fyrri hálfleik fyrst og fremst. Ef Keflavík komst nálægt teig Leiknismanna varð úr því mark í fyrri hálfleik. Tökum samt ekkert af Keflavík sem þurfti að nýta sín færi. Það er þó óþarfi að færa þeim þau á silfurfati
Bestu leikmenn
1. Dagur Ingi Valsson
Tvö mörk og stoðsending að auki . Flottur leikur hjá Degi sem kemur sér á blað í deildinni fyrir vikið.
2. Stefán Jón Friðriksson
Er að koma virkilega sterkur inn á miðjuna í þessu Keflavíkurliði. Öflugur í að verjast og er að finna leiðina að markinu líka. Þá verður líka að minnast á Ásgeir Orra markvörð Keflavíkur sem varði oft á tíðum virkilega vel í leiknum.
Atvikið
Atvikið gerist undir lok leiks þegar Keflavík tilkynnir val sitt um mann leiksins. Fyrir valinu hjá Keflavík varð jú markvörðurinn Ásgeir Orri Magnússon sem er kómískt í 5-0 sigurleik. En þótt það sé kómískt er það alveg réttlætanlegt val þó ég hafi vissulega farið í aðra átt.í
Hvað þýða úrslitin?
Keflavík fer í átta stig og lyftir sér upp í fjórða sæti deildarinnar. Leiknir enn fast á botninum með sín þrjú stig.
Vondur dagur
Varnartilburðir Leiknis í fyrri hálfleik voru ekki til útflutnings. Keflavík fékk greiðan aðgang að vítateig þeirra og nýtti sér það til þess að skora fimm mörk á 36 mínútum. Tölfræðin sagði líka ýmislegt um það en lið Leiknis fékk aðeins dæmdar á sig tvær aukaspyrnur í fyrri hálfleik. Heyrði því fleygt á vellinum að þeir hefðu verið svo langt á eftir þeim að þeir gátu ekki einu sinni brotið á þeim. Þá ber einnig að nefna Harald Frey þjálfara Keflavíkur sem fær að líta rauða spjaldið í fyrri hálfleik fyrir að grýta brúsa í grasið sem skoppaði svo inn á völlinn og það verandi 5-0 yfir.
Dómarinn - 7
Stóru atriðin sem máli skipta í fótbolta voru rétt. Alltaf má tína eitt og annað til sem mögulega mátti fara betur en heilt yfir góð frammistaða hvað dómgæslu varðar í kvöld.