SKÝRSLAN: FH tók öll stigin í Lautinni
Hvað réði úrslitum?
Fylkir kom einfaldlega hálfsofandi inn í leikinn á meðan FH byrjaði leikinn af krafti og tók strax forystu á 6. mínútu leiksins. Eftir það vöknuðu Fylkiskonur aðeins til lífsins en maður átti ekkert mikla von á því að þær myndu skora.
Bestu leikmenn
1. Andrea Rán Snæfeld Hauksdóttir
Mjög öflug frammistaða hjá Andreu hér í dag. Hún var allt í öllu miðsvæðis og ég tók sérstaklega eftir því að hún átti margar góðar langar sendingar í leiknum sem nýttust FH ágætlega oft á tíðum.
2. Snædís María Jörundsdóttir
Skoraði tvö mörk hér í dag. Fannst hins vegar ekkert voðalega mikið fara fyrir henni í leiknum en hún var réttur maður á réttum stað þegar þess var þörf og uppskar tvö mörk hér í dag. Einnig vil ég hrósa Ídu og Örnu fyrir þeirra frammistöður hér í dag.
Atvikið
Fyrsta markið hjá FH er atvik leiksins. Markið setti algjörlega tóninn í leiknum eftir að Fylkir hafði varla komist yfir miðju á upphafsmínútum leiksins. Ég átti reyndar von á því að þetta ætti eftir að vera langur dagur fyrir Fylki eftir þetta mark en þær spiluðu svo betur eftir markið.
Hvað þýða úrslitin?
Fylkir er nú komið í 9. sæti deildarinnar eftir sigur Keflavíkur gegn Víkingi fyrr í dag. FH er hins vegar komið upp í 4. sæti deildarinnar.
Vondur dagur
Mér fannst engin í liði Fylkis eiga góðan dag hér í dag. Liðið fékk sín tækifæri en það vantaði alltaf aðeins upp á að gera eitthvað gott úr þeim. Fátt sem gekk upp hjá liðinu í dag.
Dómarinn - 6
Var ósammála þónokkrum hlutum í dag hjá Brynjari. Mér fannst að Arna Eiríks hefði átt að fá gult spjald snemma í leiknum þegar hún fór með takkana í sköflunginn á Evu þegar hún reyndi að pota í lausan bolta. Mögulega náði hún ekki að hæfa almennilega í sköflunginn á Evu og þess vegna fékk hún ekki spjald. Mér fannst þetta hins vegar skrýtið. Einnig undir lok fyrri hálfleiks er Erna Sólveig að hreinsa boltann hátt úr vítateig Fylkis og boltinn á viðkomu í hendi hennar en ekkert dæmt.