SKÝRSLAN: Tveir i röð hjá Keflavík
Hvað réði úrslitum?
Krafturinn í Keflavík. Þær lögðu einfaldlega meira í leikinn, hentu sér í tæklingarnar sem þurfti til að verja mark sitt eða vinna boltann og börðust umfram allt einfaldlega meira og harðar en Víkingar. Þarf einfaldlega ekki að eyða fleiri orðum í það.
Bestu leikmenn
1. Caroline Mc Cue Van Slambrouck
Hún var hætt en er að eiga hreint út sagt frábæra leiki leik eftir leik. Límið sem bindur saman vörn Keflavíkur sem hefur nú haldið hreinu tvo leiki í röð
2. Susanna Joy Friedrichs
Hélt Sigdísi Evu því sem næst alveg niðri í leiknum í dag. Auk þess ógnaði hún sóknarlega og hefði að ósekju mátt skora í dag er hún fékk dauðafæri. Þá verður einnig að nefna Sigurbjörgu Diljá Gunnarsdóttur sem gerði sigurmark leiksins og sitt fyrsta mark í efstu deild.
Atvikið
Sigurmark Sigurbjargar fær þennan reit í dag. Þurfti tvær tilraunir til af örstuttu færi en yfir línuna fór boltinn og það eitt skiptir máli. Spurning hvernig umræðunar við eldhúsborðið heima hjá henni hafa verið yfir kvöldmatnum en mark hennar og sigur Keflavíkur sendi karl faðir hennar Gunnar Magnús Jónsson þjálfara Fylkis niður í níunda sæti deildarinnar.
Hvað þýða úrslitin?
Keflavík lyftir sér upp um eitt sæti úr því níunda í það áttunda með sex stig. Víkingar með sín átta stig í sjötta sætinu.
Vondur dagur
Það voru margar í liði Víkings sem voru ekki á deginum sínum í dag. Sigdís Eva hefur oft verið meira áberandi, Shaina Faiena Ashouri sömuleiðis. Þá var Kristín Erla Ó Johnson á köflum í basli í bakverðinum.
Dómarinn - 8
Lítið upp á teymið að kvarta í dag. Skiluðu sínu verki vel frá mínum bæjardyrum séð.