SKÝRSLAN: Akureyrarsigur í bongóblíðu
Hvað réði úrslitum?
Þór/KA kom einfaldlega miklu betur út í seinni hálfleikinn og uppskar sigurinn þar. Leikurinn var nokkuð jafn í fyrri hálfleik, Þór/KA þó aðeins betri. Hildur Anna kom einfaldlega Þór/KA á bragðið með marki sínu beint úr hornspyrnu og þá fannst mér Þór/KA tvíeflast töluvert á meðan Stjarnan missti dampinn.
Bestu leikmenn
1. Hildur Anna Birgisdóttir
Hildi er skipt inn á völlinn í byrjun seinni hálfleiks og setur strax sitt mark á leikinn með því að skora beint úr hornspyrnu og leggja síðan upp þriðja markið stuttu seinna eftir aðra hornspyrnu. Var virkilega öflug á miðjunni í seinni hálfleiknum.
2. Sandra María Jessen
Hundrað marka konan var mjög góð í dag. Eins og flestallir vita þá er hún einn besti leikmaður deildarinnar og hún sýndi það svo sannarlega í dag.
Atvikið
Hér fær maður smá valkvíða. Hvort er atvikið hundraðasta mark Söndru í efstu deild eða hornspyrnumark Hildar? Ég ætla að vera mjög dipló og segja að bæði atvikin hafi verið atvik leiksins.
Hvað þýða úrslitin?
Bæði lið eru ennþá í sama sæti og fyrir leik, Þór/KA í 3. sæti og Stjarnan í 5. sæti, en það eru hins vegar þrír leikir á dagskrá í deildinni á morgun. Sigurinn er hins vegar mikilvægur fyrir Þór/KA ef þær ætla sér að vera í toppbaráttunni við Val og Breiðablik þar sem þú mátt ekki stíga feilspor.
Vondur dagur
Allt Stjörnuliðið kemur gríðarlega illa inn í seinni hálfleikinn og tapar leiknum á fyrstu mínútum hans. Í báðum hornspyrnunum sem var skorað mark úr voru leikmenn hálfsofandi og það getur ekki verið auðvelt að gíra sig upp fyrir restina af leiknum eftir þetta.
Dómarinn - 7
Ágætur leikur hjá Stefáni og hans teymi. Þurfti ekki að taka neinar stórar ákvarðanir en ég var ósammála í nokkrum atvikum. Það breytti hins vegar ekki miklu.