Þór/KA kom einfaldlega miklu betur út í seinni hálfleikinn og uppskar sigurinn þar. Leikurinn var nokkuð jafn í fyrri hálfleik, Þór/KA þó aðeins betri. Hildur Anna kom einfaldlega Þór/KA á bragðið með marki sínu beint úr hornspyrnu og þá fannst mér Þór/KA tvíeflast töluvert á meðan Stjarnan missti dampinn.

Hér fær maður smá valkvíða. Hvort er atvikið hundraðasta mark Söndru í efstu deild eða hornspyrnumark Hildar? Ég ætla að vera mjög dipló og segja að bæði atvikin hafi verið atvik leiksins.

Bæði lið eru ennþá í sama sæti og fyrir leik, Þór/KA í 3. sæti og Stjarnan í 5. sæti, en það eru hins vegar þrír leikir á dagskrá í deildinni á morgun. Sigurinn er hins vegar mikilvægur fyrir Þór/KA ef þær ætla sér að vera í toppbaráttunni við Val og Breiðablik þar sem þú mátt ekki stíga feilspor.

Allt Stjörnuliðið kemur gríðarlega illa inn í seinni hálfleikinn og tapar leiknum á fyrstu mínútum hans. Í báðum hornspyrnunum sem var skorað mark úr voru leikmenn hálfsofandi og það getur ekki verið auðvelt að gíra sig upp fyrir restina af leiknum eftir þetta.

Ágætur leikur hjá Stefáni og hans teymi. Þurfti ekki að taka neinar stórar ákvarðanir en ég var ósammála í nokkrum atvikum. Það breytti hins vegar ekki miklu.