Hvað skal segja? Heilt yfir fannst mér Valsmenn betri í leiknum. Ég hélt að við værum að fara að sjá týpiskan Víkingssigur bæði eftir að Valdimar kom þeim yfir í fyrra skiptið og seinna skiptið. Þegar Víkingar komust í 2-1 fóru þeir að bakka mjög neðarlega á völlinn og leyfðu Val að koma dálítið á sig. Arnar talaði um að hann var ekki sáttur með það en eftir að þeir bökkuðu svona neðarlega beið maður bara hreinlega eftir jöfnunarmarkinu. Sem kom svo djúpt inn í uppbótartíma úr heldur betur umdeildri vítaspyrnu. Valsmenn heilt yfir betri en bjarga stigi. Bæði lið væntanlega brjáluð.

Klárlega seinna vítaspyrnan sem Valsmenn fengu. Fannst þetta alltaf víti við fyrstu sýn en eftir að hafa séð þetta aftur og aftur er ég ekki á því að þetta hafi verið víti. Risa ákvörðun sem gæti haft stór áhrif á lokaútkomu mótsins.

Víkingur eru áfram á toppnum og verða það eftir þessa umferð. Valsmenn jafna Blika á stigum sem eiga leik á morgun gegn KA.

Aron Jóhannsson átti ekki sinn besta leik í dag fannst mér. Hann kom með tvo fína bolta upp völlinn í fyrri hálfleik minnir mig en hann var að ströggla varnarlega og var tekinn útaf, vegna meiðsla reyndar, í seinni hálfleik.

Heilt yfir fyrir utan þessar stóru ákvarðanir og uppbótartíman fannst mér þetta vel dæmdur leikur. En þú ert dæmdur á stórum ákvörðunum sem dómari og þær voru ekki réttar í dag að mínu mati eftir að hafa skoðað þær aftur. Víkingar áttu einnig að fá víti í byrjun leiks þegar Niko Hansen var tekinn niður. Seinna vítið er ég samt sem áður á báðum áttum með. En mér fannst línan öðruvísi í seinni hálfleiknum en hún var í þeim fyrri. Leikurinn leystist svo upp í einhverja vitleysu í uppbótartímanum og mér fannst dómararnir ekki leysa það vel. Arnar kallaði Ívar Orra ekki ömurlegan í viðtali eftir leikinn líkt og hann gerði eftirminnilega eftir leikinn gegn Blikum í fyrra en hann tjáði sig bara alfarið ekkert um dómgæsluna eftir leikinn í kvöld. Hann var ekki ömurlegur en ekki góður í dag að mínu mati.