Framarar voru miklu betra liðið í fyrri hálfleik en fóru bara með 1-0 stöðu inn í hálfleikinn. Þeir hefðu hæglega getað skorað meira en þeir áttu eftir að naga sig í handabökin að hafa ekki gert það. HK kom að krafti inn í seinni hálfleikinn. Þeir þurftu þó smá heppni til að skora fyrsta markið en fyrirgjöf Birnis Breka fór í Brynjar Gauta og inn, það var svo bakfallspyrna frá Þorsteini Aroni sem skilaði sigurmarkinu. Framarar lágu svo gríðarlega á HK í endan en þar fóru færin mikið í slá, stöng eða rétt framhjá.

Nokkur áhugaverð atvik í þessum leik sem tengjast dómgæslu. Áhugaverðast líkast til tæklingin hjá Kristjáni Snæ á 50. mínútu þegar staðan var ennþá 1-0. Kristján hoppar með báða fætur á undan sér í tæklingu en fær bara gult spjald. Þarna finnst mér augljóst að hann hefði átt að fá að líta rautt.

Framarar eru án sigurs í deildinni 5 leiki í röð og falla niður í 7. sæti. HK sækir sinn þriðja sigur á tímabilinu og eru í 9. sæti.

Gummi Magg var kannski frekar óheppinn heldur en lélegur. Hann átti nokkur mjög góð skallafæri sem skullu í slánni eða fóru bara rétt framhjá. Hann hefði viljað skora úr eitthvað af þessum færum.

Helgi Mikael og hans teymi voru í vandræðum í dag. Mér finnst það greinilegt að Kristján Snær á að fá rautt spjald, svo er það hægt að færa rök fyrir því að Atli Hrafn eigi líka að fá rautt spjald, og mögulega Brynjar Gauti seinna gula. Það voru einhver vítaköll en ég held að teymið hafi farið rétt með það. Svo var óþarflega mikið af litlum atvikum sem voru röng eins og að gefa ekki horn þegar markmaðurinn snerti augljóslega boltan, og alveg eins brot sem var stundum dæmt á en stundum ekki.