SKÝRSLAN: Tvö lið að stinga af eftir Fjölnissigur á sumarkvöldi í Mosó
Hvað réði úrslitum?
Fjölnismenn mættu af krafti inn í leikinn og skoruðu snemma. Afturelding reyndu hvað þeir gátu að finna lausnir og það tókst þrisvar. Þeir fengu þrjú mjög góð færi til að jafna en það tókst ekki. Þetta var bara ekki dagurinn þeirra. Fjölnismenn eru vanari sigurtilfinningunni þessa dagana.
Bestu leikmenn
1. Baldvin Þór Berndsen (Fjölnir)
Var frábær í vörn Fjölnismanna. Var á láni hjá Ægi í fyrra og nýtti þá reynslu vel. Hann og Júlíus Mar eru að mynda eitt besta miðvarðapar deildarinnar.
2. Guðmundur Karl Guðmundsson (Fjölnir)
Er búinn að vera besti leikmaður Fjölnis í sumar og var frábær í kvöld. Leiðtoginn á miðsvæðinu sem gerir allt svo vel.
Atvikið
Það er eiginlega dauðafærið sem Arnór Gauti klúðrar í lokin. Algjörlega frábært færi sem hefði getað jafnað leikinn rétt áður en flautan gall.
Hvað þýða úrslitin?
Fjölnir og Njarðvík eru að stinga af en þau sitja í efstu tveimur sætunum, bæði með 20 stig. Næsta lið þar á eftir er með 13 stig. Afturelding er í sjöunda sæti með ellefu stig en sá árangur er svo sannarlega undir væntingum.
Vondur dagur
Elmar Kári Enesson Cogic átti ekki sinn besta dag og komst ekki mikið áleiðis. Hann fékk frábært færi til að jafna í lokin en tókst það ekki. Er einn besti leikmaður deildarinnar en náði ekki að sýna það í kvöld. Georg Bjarnason og Gunnar Bergmann Sigmarsson voru út á þekju í marki Fjölnis.
Dómarinn - 9
Mér fannst Sveinn bara dæma leikinn býsna vel. Það var vafaatriði undir lokin um það hvort Afturelding hafi átt að fá vítaspyrnu en eftir að hafa horft á atvikið aftur, þá fannst mér Sveinn taka rétta ákvörðun þar.