Stjarnan fannst mér varla mæta til leiks, hægir og seinir í návígi og topplið Víkings refsar fyrir það. Í síðari hálfleik fannst mér Stjarnan pressa meira en Víkingar áttu afar auðvelt með að spila í gegnum þá pressu. Mörk Víkinga hefðu hæglega getað orðið fleiri hefðu þeir nýtt öll færi sín. Verður fróðlegt að sjá XG tölfræðina. Spennandi verður að sjá viðureign þessara liða í Mjólkurbikarnum næstkomandi miðvikudag.

Í fyrsta marki leiksins er Danijel Djuric og Óli Valur í baráttu og Djuric togar aðeins í Óla. Jökull þjálfari Stjörnunnar óánægður með að ekkert hafi verið dæmt og fær gult spjald að launum, spurning hvort þetta hafi algerlega slökkt á Stjörnunni.

Víkingar eru á toppi deildarinnar nú með fjögurra stiga forystu en Breiðablik á leik til góða. Stjarnan er í 7. sæti deildarinnar með 16 stig, tapað fjórum af síðustu fimm leikjum.

Hvar á maður að byrja, enginn góður hjá Stjörnunni í dag. Sindri Þór fannst mér þó eiga slökustu frammistöðuna í vörninni en ekki hægt að skella skuldinni allri á einn mann, herfileg frammistaða hjá öllu liðinu í dag.

Hefði getað dæmt brot í aðdraganda fyrsta marks leiksins. Í stöðunni 3-0 og 4-0 fannst mér Erlendur hálf vorkenna Stjörnunni og línan varð þá mjög skrýtin. Víkingar fengu spjöld en Stjörnuleikmenn sluppu. Árni Snær heppinn að fá ekki rautt undir lok leiks er Ari Sigurpáls pikkaði boltanum framhjá honum og Árni fer seint í hann. Einnig vítaspyrnukall þegar Sveinn Gísli var tekinn niður í teignum. Kannski eðlileg viðbrögð Erlends að bæta ekki gráu ofan á svart en auðvitað á sama lína að gilda um bæði lið.