SKÝRSLAN: Andi yfir Fimleikafélaginu
Hvað réði úrslitum?
FH-ingar voru kraftmeiri á löngum köflum í leiknum og mér fannst þeir verðskulda sigurinn út frá því. Þetta var alls ekki gæðamesti fótboltaleikur sögunnar en leikmenn FH voru tilbúnir að berjast fyrir hvorn annan frá fyrstu sekúndu til þeirrar síðustu. Þeir fengu fólkið með sér í stúkunni og það hjálpaði. Það var sterkur andi yfir Fimleikafélaginu í kvöld. Þetta var bara eins og í gamla daga.
Bestu leikmenn
1. Ólafur Guðmundsson (FH)
Sá var góður! Stóð vaktina frábærlega í hjarta varnarinnar. Mjög öflugur. Átti nokkrar frábærar tæklingar og leiddi liðið áfram í fjarveru Björns Daníels.
2. Ástbjörn Þórðarson (FH)
Skoraði markið sem skildi liðin og barátta hans var einkennandi fyrir liðið.
Atvikið
Auðvitað markið sem Ástbjörn skoraði. Það var úrslitaatriðið í leiknum.
Hvað þýða úrslitin?
FH er áfram jafnt ÍA að stigum í baráttunni um fjórða sætið. Á meðan er Breiðablik núna fjórum stigum á eftir Víkingi í toppbaráttunni.
Vondur dagur
Blikar voru svolítið litlir í sér og þetta var bara ekki nógu gott lengst af. Það er alveg hægt að nefna nokkra hérna. Aron Bjarnason fann engan veginn taktinn og komst ekki mikið í tengingu við leikinn. Benjamin Stokke er áfram í vandræðum fyrir framan markið. Patrik Johannesen átti erfitt uppdráttar. Bara ekki nógu gott hjá þeim grænu þegar þeir mættu á grasið. Hafa ekki unnið í Kaplakrika síðan 2019.
Dómarinn - 9
Elías Ingi bara mjög flottur í þessum leik ásamt sínu teymi. Yfir mjög litlu að kvarta.