SKÝRSLAN: Gulir og glaðir á leið á Laugardalsvöll
Hvað réði úrslitum?
Baráttuglaðir KA menn voru staðráðnir í að komast í þennan bikarúrslitaleik. Þeir vörðust vel, voru sjaldan opnaðir og sýndu svo klærnar sóknarlega. Þeir hefðu mátt vera miskunnarlausari í lok leiks, en þeim er nákvæmlega sama núna.
Bestu leikmenn
1. Daníel Hafsteinsson (KA)
Skoraði frábært mark og sýndi mikil gæði á boltanum þegar að KA liðið hélt aðeins í hann. Svo hljóp hann eins og maraþonhlaupari um allan völl og lét vel fyrir sér finna.
2. Jakob Snær Árnason (KA)
Það var ekki að sjá að þetta væri fyrsti byrjunarliðsleikur Jakobs í marga mánuði. Hann var eins og rennilás upp og niður vinstri kantinn. Barðist eins og ljón og átti markið sitt svo sannarlega skilið.
Atvikið
Það var verulega vel að marki Daníels staðið. Sveinn Margeir gerði frábærlega í að halda boltanum uppi og finna Hallgrím Mar, sem að vissi af hlaupi Daníels. Daníel afgreiddi boltann svo listavel í fjærhornið framhjá löngum örmum Frederiks Schram.
Hvað þýða úrslitin?
KA er komið í úrslitaleik Mjólkurbikarsins annað árið í röð. Þeir vonast til þess að ganga skrefinu lengra í þetta sinn, en þeir töpuðu 3-1 fyrir Víkingum á síðasta ári. Valsmenn ljúka keppni þetta árið í undanúrslitum.
Vondur dagur
Hólmar Örn Eyjólfsson og Orri Sigurður Ómarsson áttu í mesta basli með Svein Margeir og Ásgeir Sigurgeirsson í dag. Voru oft seinir til og aðeins of linir í loftinu gegn aðgangshörðum KA mönnum.
Dómarinn - 6
Fannst hann allt í lagi, ekki frábær.