SKÝRSLAN: Leikmaður sem við eigum líklega eftir að heyra mikið meira af
Hvað réði úrslitum?
Það var afskaplega fátt sem skildi þessi lið að í kvöld. Mér fannst þetta bara mjög jafn leikur sem hefði getað dottið báðum megin. Tempóið var ekki mikið í seinni hálfleik og það stefndi allt í markalaust jafntefli, en það var Ragnheiður Þórunn Jónsdóttir sem potaði boltanum yfir línuna undir lokin.
Bestu leikmenn
1. Berglind Rós Ágústsdóttir (Valur)
Var virkilega öflug á miðsvæðinu hjá Val. Vann ófá einvígi og gerði sitt bara mjög vel, líkt og venjulega.
2. Ragnheiður Þórunn Jónsdóttir (Valur)
Þessi 16 ára stelpa gerði sigurmarkið í þessum sigri. Spilaði allan leikinn og var hættuleg.
Atvikið
Auðvitað sigurmarkið sem Ragnheiður Þórunn skoraði. Leikmaður sem á svo sannarlega framtíðina fyrir sér. Það er alls ekki auðvelt að komast í þetta Valslið og hvað þá þegar þú ert á þessum aldri. Um að gera að leggja þetta nafn á minnið því þetta er eflaust leikmaður sem við eigum eftir að heyra meira af.
Hvað þýða úrslitin?
Valur er með jafnmörg stig og Breiðablik á toppi deildarinnar. Þróttur er áfram í sjöunda sæti með tíu stig.
Vondur dagur
Lengst af var þetta ekkert rosalega skemmtilegur leikur fyrir þá áhorfendur sem lögðu leið sína á völlinn. Það var greinileg þreyta í liðunum í seinni hálfleik sérstaklega og það hafði mikil áhrif á leikinn. Það var sofandaháttur í vörn Þróttar í markinu, einbeitingarleysi í nokkrar sekúndur sem kostaði þær stig í þessum leik.
Dómarinn - 4,5
Mér fannst Þróttur eiga að fá vítaspyrnu og mér fannst dómarateymið klikka þar. Annars fannst mér leikurinn bara nokkuð vel dæmdur, en þetta var stórt atvik.