SKÝRSLAN: Álagið farið að segja til sín
Hvað réði úrslitum?
Leikurinn var opinn og skemmtilegur í upphafi en Þór/KA átti líklega ívið betri færi. Það voru síðan FH-ingar sem komust yfir með marki úr vítaspyrnu undir lok fyrri hálfleiks. Seinni hálfleikurinn mun lokaðari. Mikil þreyta virtist setja strik í reikninginn hjá Þór/KA sem náði lítið sem ekkert að ógna forystu FH.
Bestu leikmenn
1. Ída Marín Hermannsdóttir
Sífellt ógnandi og fékk vítið eftir glæsilegan sprett og skoraði svo sjálf
2. Aldís Guðlaugsdóttir
Örugg í rammanum. Þór/KA náði ekki að ógna henni mjög mikið en hún stóð fyrir sínu.
Atvikið
Eftir fjörugan leik í fyrri hálfleik þurfti mark úr vítaspyrnu til að skilja liðin að. Leikmenn Þór/KA naga sig í handabökin að nýta ekki færin fram að markinu. Set líka spurningamerki við rauða spjaldið sem Elísa Lana fékk, mjög litlar sakir.
Hvað þýða úrslitin?
FH minnkar bilið milli liðanna í 3. og 4. sæti niður í tvö stig. Virkilega sterkur sigur hjá Hafnfirðingum eftir að hafa tapað tveimur leikjum á móti Þór/KA fyrir sunnan í sumar.
Vondur dagur
Álagið farið að segja til sín hjá Þór/KA. Spilað þétt undanfarið og Jóhann Kristinn stillti upp óbreyttu liði frá tapi liðsins gegn Breiðabliki eftir framlengingu í Mjólkurbikarnum á föstudaginn. Liðið byrjaði ágætlega í dag en gekk illa að ná almennilegri tilraun á markið. Sandra María átti líklega besta færi leiksins þegar skot hennar fór rétt framhjá.
Dómarinn - 5
Fínn leikur hjá honum. Fannst hins vegar rauða spjaldið á Elísu Lönu setja strik í reikninginn hjá honum. Það var heldur strangur dómur.