Liðin ganga út á völlinn 6. flokkur Leiknis labbar með liðunum út á völlinn en þessir efnilegu piltar eru með Heimaklettsbikarinn eftirsótta sem þeir unnu á Orkumótinu í Vestmannaeyjum á dögunum.

Omar Sowe ekki með Leikni
Omar Sowe er ekki með Leikni í kvöld. Er að glíma við einhver meiðsli og því ekki leikfær. Högg fyrir Breiðholtsliðið. Þorsteinn Emil Jónsson kemur inn í hans stað.

Þá er bakvörðurinn Arnór Ingi Kristinsson í leikbanni eftir að hafa fengið rautt spjald í Vestmannaeyjum. Marko Zivkovic fær tækifærið í hans stað.

Úlfur breytir ekki jafnteflisliði
Úlfur Arnar Jökulsson þjálfari Fjölnis er með óbreytt lið frá markalausa jafnteflinu gegn Keflavík í síðustu umferð. Það var ekki skemmtilegur leikur, vonandi verður skemmtanagildið mun hærra í kvöld.

Austmann tvíburarnir eru báðir á sínum stað en þeir eru fyrrum leikmenn Leiknis, mættir á sinn gamla heimavöll.

Sumar og súld Velkomin til leiks í Breiðholtinu. Fyrst ber að þakka Sölva Haraldssyni fyrir þræleðlilega upphitunarpunkta og skemmtiefni hér að neðan. Súldarsumarið mikla heldur áfram og það er ágætis gustur að auki hér á Domusnova-vellinum. En samkvæmt upplýsingum frá færustu veðurfræðingum landsins þá á að stytta upp rétt fyrir leik.

Það styttist í að byrjunarliðin verði opinberuð en það hvíslaði að mér lítill fugl að þar væri nú eitthvað áhugavert. Bíðið spennt!

Leikurinn í beinni á Youtube

Þriðja liðið Það verður enginn annar en Erlendur Eiríksson sem mun dæma þennan leik í kvöld en honum til aðstoðar verða þeir Jovan Subic og Ronnarong Wongmahadthai. Eftirlitsmaður KSÍ er Hjalti Þór Halldórsson.

Fyrri leikur liðanna Liðin mættust fyrr á tímabilinu í afar bragðdaufum leik inni í Egilshöllinni. Þá unnu Fjölnismenn 1-0 sigur en mark Fjölnismanna skoraði Dagur Ingi Axelsson sem hefur byrjað tímabilið mjög vel fyrir Grafarvogsliðið.

„Sérfræðingurinn“ Baldvin Már Borgarsson, sérfræðingur Fótbolta.net um Lengjudeildina, var ekki með neinn leik réttan þegar hann spáði í fyrstu umferðina.

Ég endurtek: sérfræðingur Fótbolta.net um Lengjudeildina var ekki með neinn leik réttan.

Með einhverjum ólíkindum fékk hann annað tækifæri og ég efast um að hann verði með einn réttan aftur en svona spáir hann leiknum í kvöld:

Leiknir 2 - 1 Fjölnir (í kvöld klukkan 19:15)
Deildin þéttist enn frekar með sigri Leiknis.

Vonbrigða byrjun í efra Breiðholtinu Miðað við væntingar fyrir tímabilið gátu Leiknismenn varla farið verr af stað. Vigfús Arnar fór eftir hræðilegt 5-0 tap í Keflavík en þá var liðið aðeins búið að vinna einn leik en tapa rest. Ólafur Hrannar hefur tekið við liðinu en það er allt annað að sjá Leiknisliðið í dag. Þeir byrjuðu að vinna þrjá leiki í röð eftir hans komu en núna seinast fóru þeir til Eyja og töpuðu 1-0 gegn ÍBV.

Tróna einir á toppnum Fjölnisliðið hefur byrjað leiktíðina gífurlega vel. Betur en öll hin lið deildarinnar en þeir eru á toppi deildarinnar með fjögurra marka forystu. Eini tapleikur Fjölnis í fyrri helming deildarinnar var gegn ÍR-ingum í Breiðholtinu en það er spurning hvort þeir munu vinna í Breiðholtinu í dag annað en þeir gerðu í Skógarselinu.

Fjórir Fjölnismenn í úrvalsliðinu
Máni Austmann er markahæsti leikmaður deildarinnar ásamt Braga Karli, leikmanni ÍR, en Máni var valinn í úrvalslið fyrri umferðar deildarinnar, samt ekki Bragi. Það eru þrír aðrir Fjölnismenn í úrvalsliðinu.

Lengjudeildarkvöld! Veriði heil og sæl ágætu lesendur og veriði hjartanlega velkomin í þessa þráðbeinu textalýsingu frá leik Leiknis og Fjölnis í Lengjudeildinni.