Jafn og spennandi baráttuleikur í Breiðholtinu þar sem Leiknismenn eru skiljanlega hundsvekktir að fara tómhentir úr. Heimamenn voru meira með boltann en gekk illa að finna glufur gegn öflugri vörn Fjölnismanna. Grafarvogsliðið virkar sem vel smurð vél.

Þéttingsfast skot Dags Inga Axelssonar sem reyndist eina mark leiksins. Aftur sér Dagur Ingi um að klára Leiknisliðið. Fjölnir vann Leikni 1-0 í Egilshöll snemma tímabils þar sem Dagur Ingi skoraði einnig eina mark leiksins á nánast sama tíma í leiknum. Það var endursýning í súldinni.

Fjölnir trónir á toppnum með sjö stiga forystu og hefur aðeins fengið tólf mörk á sig. Varnarleikur liðsins hefur verið svakalega öflugur. Leiknir er tveimur stigum frá fallsæti og verkefni Breiðhyltinga núna er fyrst og fremst að halda lífi í þessari deild.

Omar Sowe helsti markaskorari Leiknis var frá vegna meiðsla og því miður fyrir heimamenn náði enginn að stíga upp í hans fjarveru. Liðið komst oft í álitlegar stöður en fóru illa að ráði sínu. Það vantaði sköpunarmátt til að geta rekið smiðshöggið.

Erlendur Eiríksson var með fullkomna stjórn á leiknum. Beitti hagnaðnum vel og negldi öll gul spjöld og aukaspyrnudóma. Fjölnismenn vildu fá rautt spjald á leikmann Leiknis en rétt eins og dómararnir þá sá ég ekki það atvik í teignum og get því ekki dregið tríóið niður fyrir það.