SKÝRSLAN: Keflavík nýtti sér kæruleysi Gróttu
Hvað réði úrslitum?
Hvers vegna mætir Grótta aldrei til leiks í síðari hálfleik? Það væri kannski réttari spurning sem stendur. Eiginlega ótrúlegt að enn og aftur komist þeir yfir en missi það niður í tap. Eftir að hafa komist yfir í fyrri hálfleik var eins og allur vindur væri úr þeim er sá síðari hófst og Keflavík gekk á lagið.
Bestu leikmenn
1. Ari Steinn Guðmundsson
Ef Keflavík hefði nýtt 30% færa sem hann skapaði væri hann með sennilega fjórar stoðsendingar. Skoraði þó frábært mark og átti fínasta leik
2. Ásgeir Páll Magnússon
Hef ekki tölu á því hversu oft hann valtaði yfir Tumeliso Ratsiu varnarlega. Ógnaði líka fram á við og átti gott kvöld.
Atvikið
Stórglæsilegt mark Sindra Snæs Magnússonar sem jafnaði leikinn. Algjör klíning af löngu færi stöngin inn. Frábært mark í alla staði.
Hvað þýða úrslitin?
Keflavík vinnur sinn þriðja sigur í sumar og fer í 7. sætið með 15 stig. Grótta í 11.sæti með 10 stig og gætu endað í botnsætinu taki lið Dalvík/Reynis upp á því að vinna Njarðvík
Vondur dagur
KSÍ minnir á að heiðarleg framkoma utan vallar sem innan leiðir af sér betri og skemmtilegri knattspyrnu. Berum virðingu fyrir öllum þátttakendum leiksins. Þetta eru orð sem lesin hafa verið á undan fjölmörgum knattspyrnuleikjum undanfarin ár og eiga alltaf vel við. Fjölmiðlafólk er hluti leiksins og þá sérstaklega í efri deildum þar sem viðvera þess er meiri en annars. Þessi reitur er valin undir þessi orð því þau eru eitthvað sem Chris Brazell þjálfari Gróttu mætti tileinka sér. Ég erfi það ekki við hann að vera ósáttur með erfiða spurningu í viðtali enda svaraði hann henni eins og hann taldi best. Það að kalla til mín og tala til mín af vanvirðingu að viðtali loknu er hins vegar eitthvað sem ég tek ekki hljóðalaust hvað þá þegar það er ítrekað af hendi sama aðila í sumar.
Dómarinn - 8
Ekkert upp á Jóhann að klaga í kvöld. Gott að sjá hann aftur á vellinum eftir meiðsli.