Víkingar voru miklu tilbúnari í baráttuna á VÍS vellinum í kvöld. Mikill skjálfti í heimakonum en Víkingar pressuðu vel á þær sem olli miklum ursla í öftustu línu hjá Þór/KA. Þór/KA skapaði sér lítið sem ekkert og verðskuldaður sigur Víkinga staðreynd.

Bergþóra Sól Ásmundsdóttir opnaði markareikninginn sinn með Víkingum undir lok fyrri hálfleiks eftir að hafa gengið til liðs við félagið frá sænska liðinu Örebro. Gerði virkilega vel að vinna Huldu Björg Hannesdóttir í baráttunni um boltann.

Þór/KA hefur fengið þrjú stig út úr síðustu fjórum leikjum en liðið hefur tapað þremur heimaleikjum í röð í deildinni. Liðið er í 3. sæti með 24 stig en Víkingur er aftur komið á sigurbraut eftir tap gegn Val í síðustu umferð. Liðið er í 4. sæti með 19 stig, jafnmörg stig og FH sem á leik til góða gegn Þrótti á útivelli á morgun.

Þór/KA var í stökustu vandræðum í leiknum frá aftasta til fremsta manns. Mikill skjálfti í vörninni í upphafi leiks og liðið náði varla að ógna Birtu Georgsdóttir í marki Víkinga. Hættulegasta færið kom rétt áður en Bergþóra Sól kom Víkingum yfir en Birta varði skot Kimberley í slánna.

Lét leikinn rúlla vel, ekkert einasta spjald. Spurning hvort aðstoðadómarinn hafi klikkað þegar Sandra María var að sleppa í gegn en var dæmd rangstæð.