Markið hjá Guðjóni Mána í fyrri hálfleik var að lokum það sem skildi liðin að hér í kvöld. Heilt yfir fannst mér ÍR verðskulda þennan sigur en undir lok leiksins féllu ÍR-ingar aðeins aftur og Leiknir reyndi að koma boltanum í netið. ÍR-ingar náðu þó að sigla þessu heim.

Skotið í stöngina hjá Kára 73. mínútu og hreinsunin hjá Andi Hoti á 84. mínútu. Síðan voru síðustu mínútur leiksins einnig eitt stórt atvik. Mörg gul spjöld og mikill hiti. Væri til í að sjá hjartalínurit hjá leikmönnum, þjálfurum og stuðningsmönnum.

ÍR er í fjórða sæti deildarinnar með 22 stig og hafa sigrað fimm af síðustu sjö leikjum. Leiknir situr hins vegar í ellefta sæti deildarinnar með tólf stig og hefur mátt muna sinn fífil fegurri.

Ekkert sérstakt sem stendur upp úr í mínum huga. En það er vondur dagur fyrir Leiknismenn í heild sinni að tapa fyrir nágrönnum sínum. Síðan sagði reyndar Guðjón við mig eftir leik að hann hefði átt að skora þrjú mörk í dag. Þannig ætli hann hafi ekki bara átt vondan dag miðað við þá yfirlýsingu.

Ágæt frammistaða hjá dómarateyminu í kvöld.