Glæsimark Huldu Ósk að sjálfsögðu réði þar öllu þegar upp var staðið. Fram að því þó höfðu bæði lið farið illa með fjölmörg góð færi. Keflvíkingum svíður það eflaust meira að hafa farið illa með sín færi enda sigurinn gestaliðsins. Þegar öllu er á botninn hvolft snýst fótbolti jú um að skora mörk og ef þú nýtir ekki færin þín þá er erfitt að færa rök fyrir því að þú eigir skilið að vinna. Að sama skapi er tilfinningin eflaust léttir hjá liði Þór/KA. Þær áttu ekki sinn besta leik í sumar, fengu færi sem þær fóru illa með en Hulda sendi þrjú stig norður með flugpósti með glæsilegu skoti.

Svo lengi sem ég man hefur það verið hefð að ungir iðkendur úr félögum sjái um að vera boltakrakkar á leikjum félaga sinna. Það kom mér því nokkuð spánskt fyrir sjónir í upphafi leiks að sjá að meirihluti "boltakrakka" voru karlmenn sem ýmist voru á eða alveg við það að komast á miðjan aldur. Hreyfingar ekki alveg jafn kvikar og hjá hinum yngri sem maður er vanur að sjá en stóðu þó vel fyrir sínu. Var reyndar öllum með tölu skipt út er líða fór á leikinn og hygg ég að þeir hafi eflaust verið því fegnir.

Þór/KA fer í 27 stig í þriðja sætinu og setur átta stig milli sín og Víkinga sem sitja sæti neðar. Keflavík áfram á botninum með níu stig.

Saorla Lorraine Miller fékk sannkallað dauðafæri er hún slapp ein í gegnum vörn Þór/KA í fyrri hálfleik. Fékk nægan tíma til að ákveða hvernig hún ætlaði að setja boltann í netið sem mögulega kom henni um koll. Þegar kom að því að skjóta setti hún boltann því sem næst beint í Hörpu sem var mætt vel út á móti. Stórt augnablik sem gæti reynst dýrkeypt.

Ég er á báðum áttum í rauninni. Engin stór atvik sem hafa afgerandi áhrif en línan fannst mér stundum svolítið á reiki. Betri kaflar inn á milli en ég held að hann geti vissulega gert betur.