SKÝRSLAN: Skosk gleði í stúkunni
Hvað réði úrslitum?
Niðurstaðan er 0 - 0 og því hægt að segja að léleg nýting sóknarmanna í færum eða góðir markmenn hafi verið það sem réði úrslitum.
Síðan verð ég að minnast á stuðningsfólk St.Mirren því ekki get ég valið þau sem ,,bestir" á vellinum en þau voru algjörlega mögnuð meirihluta leiks. Sungu og trölluðu að mestu allan leikinn og fyrir leik og eftir leik. Eitthvað í kringum 400 stuðningsfólk sem drukku söngvatn stíft fyrir leik og samkvæmt Gróu á leiti, af ómannaðari (sem var ómönnuð fyrir mistök) söngvatnsdælu þeirra megin í stúkunni.
Bestu leikmenn
1. Ellery Balcombe
Markmaður St.Mirren sinnti sínu hlutverki af stakri prýði í kvöld og kom í veg fyrir að minnsta kosti þrisvar sinnum að Valsmenn myndu skora úr dauða/góðum færum.
2. Frederik Schram
Var frábær fyrir Valsmenn, sérstaklega í fyrri hálfleik þegar hann átti nokkrar mikilvægar vörslur.
Atvikið
Aron Jóh kemur inn á á 72. mínútu. Fær gult á 74 fyrir gott brot er hann stöðvaði mögulega skyndisókn. En á 80. mínútu á Jakob Franz slaka sendingu aftur fyrir, sóknarmaður St.Mirren er við það að komast í boltann og Aron tekur hann niður og fær beint rautt. Réttilega.
Hvað þýða úrslitin?
0 - 0 og þetta er ennþá góður möguleiki fyrir Valsmenn að komast áfram í þriðju umferð. Þeir þurfa að vera agaðir varnarlega og nýta færin sín í Skotlandi og þá er allt mögulegt.
Vondur dagur
Aron Jóh eins og lýst er í ,,atvikið" dálkinum.
Dómarinn - 8.5
Hreinlega ekkert út á dómarann eða dómaratríóið að setja.