Fylkiskonur mættu bara ekki til leiks. Fyrstu 15-20 mínúturnar voru algjörlega eign Stjörnunnar og á þeim kafla skoruðu þær eina mark leiksins. Fylkir átti ágætis rispur en þær náðu ekki að skapa sér mikið á síðasta þriðjungi. Sigurinn var á endanum frekar sanngjarn.

Markið sem Hrefna Jónsdóttir skoraði fyrir Stjörnuna. Það var alltaf á leiðinni á þeim tímapunkti þar sem gestirnir voru að herja á Fylkisliðið. Á endanum skildi það liðin að.

Stjarnan styrkir stöðu sína í efri hluta deildarinnar og er liðið núna með 19 stig. Það er betri bragur á Stjörnuliðinu en fyrri part sumars. Eins og Gunnar Magnús, þjálfari Fylkis, þá litu heimakonur ekki út eins og lið sem er að berjast fyrir lífi sínu í kvöld og það er áhyggjuefni. Þær þurfa að mæta betur gíraðar eftir verslunarmannahelgina ef þær ætla að halda sér uppi því þetta var ekki nógu gott. Það væri kannski góð hugmynd fyrir Fylkiskonur að skella sér á Þjóðhátíð, skemmta sér vel og mæta svo endurnærðar í síðustu leiki tímabilsins.

Kerfið hjá KSÍ hrundi fyrir leik og því varð seinkun á leiknum. Það virtist hafa meiri áhrif á Fylkisliðið þar sem þær virtust vera orðnar ískaldar þegar leikurinn byrjaði. Þær voru ekki með en á endanum var það slaka byrjunin sem varð þeim að falli í þessum leik. Sóknarleikur Fylkis var þá ekki merkilegur þegar þær þurftu að sækja mark og jafna. Ekki mikið hugmyndaflug og ákvarðanatakan var ekki góð. Bara ekki góður dagur á skrifstofunni hjá Fylki.

Frekar auðveldur leikur að dæma og ekki mikið út á dómarateymið að setja. Komust nokkuð vel frá sínu.