SKÝRSLAN: Töfrar hjá 17 ára leikmanni og eitt stig er munurinn
Hvað réði úrslitum?
Þetta var hörkuskemmtilegur leikur sem hefði getað dottið öðru hvoru megin. Þegar staðan var 2-2, þá var þetta bara járn í járn. En markið sem Hrafnhildur Ása skorar í þeirri stöðu breytir leiknum. Það slær Þór/KA út af laginu og Breiðablik gengur svo frá leiknum. Afar mikilvægt mark en Breiðablik átti líklega sigurinn skilið að lokum.
Bestu leikmenn
1. Hrafnhildur Ása Halldórsdóttir (Breiðablik)
Þessi 17 ára gamli sóknarsinnaði miðjumaður á svo sannarlega framtíðina fyrir sér. Skoraði draumamark og kemur að öðrum líka. Sendingin hennar í fjórða markinu er algjört konfekt og dæmi um þau gæði sem hún býr yfir. Með töfra í fótunum.
2. Birta Georgsdóttir (Breiðablik)
Algjör lykilkona í sóknarleik Breiðabliks. Skoraði og átti þátt í öðrum mörkum líka. Mjög lífleg og öflug í þessum leik.
Atvikið
Draumamarkið sem Hrafnhildur Ása skoraði til að koma Breiðabliki í 3-2 var klárlega atvik þessa leiks. Algjörir töfrar.
Hvað þýða úrslitin?
Breiðablik er núna bara einu stigi á eftir Val í baráttunni um Íslandsmeistaratitilinn. Það stefnir í ansi skemmtilega baráttu um þann stóra. Þessi tvö lið mætast líka í bikarúrslitaleik næsta föstudag sem gaman verður að fylgjast með. Þór/KA er í þriðja sæti og stefnir á að vera þar þegar mótið klárast.
Vondur dagur
Það voru bara 153 áhorfendur á vellinum í dag. Það er sorglegt hversu fáir mæta á leiki í kvennaboltanum, þá sérstaklega þegar við fáum eins skemmtilegan fótboltaleik og í dag. Rífa sig í gang!
Dómarinn - 8
Ekkert svakalega erfiður leikur að dæma en mér fannst Reynir Ingi dæma þetta prýðisvel.