SKÝRSLAN: Málningin hætti að þorna í seinni hálfleik
Hvað réði úrslitum?
14. mark Viktors Jónssonar í deildinni. Einfalt. Viktor skoraði á 46 mínútu leiksins eða það vill hann meina og segir að Pétur dómari hafi einnig sagt það. Skot Viktors var á leiðinni inn þegar Kennie Chopart reynir að hreinsa og boltinn í netinu. Fyrri hálfleikur er sá leiðinlegasti sem ég hef séð í sumar og sá seinni var örlítið líflegri.
Bestu leikmenn
1. Jón Gísli Eyland
Mér fannst Jón Gísli virkilega flottur, sérstaklega í seinni hálfleik.
2. Erik Tobias Sandberg
Mjög öflugur í vörn Skagamanna og hefur verið það að mestu í allt sumar.
Atvikið
Mark Viktors Jóns sem lýst er hér að ofan. Af fáum atvikum leiksins að þá er það atvikið.
Hvað þýða úrslitin?
Skagamenn eru komnir í 4. sætið eftir önnur úrslit í umferðinni og það er mögulegt Evrópusæti sem væri frábær árangur hjá nýliðunum.
Fram dettur niður í 6. sæti deildarinnar. En þó verður að minnast á að einungis munar tveimur stigum á Fram og ÍA.
Vondur dagur
Djenairo Daniels tapaði boltanum illa í aðdraganda marksins. - "Við gerum stór mistök þegar nýji leikmaðurinn minn ákveður að snúa sér í nokkra hringi á miðjunni þegar hann gat sent á samherja og þeir éta hann og fá skyndisókn og skora úr henni " sagði Rúnar Kristinsson þjálfari Fram eftir leik.
Dómarinn - 8,5
Vel dæmdur leikur hjá Pétri að venju.