SKÝRSLAN: Fyrsti sigur Vestra á Ísafirði staðreynd
Hvað réði úrslitum?
Vestramenn nýttu færin sín en KR ekki. Svo einfalt er það. Gestirnir voru mun sterkari þar til Vestri komst yfir. Eftir það jafnaðist leikurinn, Elmar kemur Vestra í 2-0 og KR nær ekki að brjóta múrinn fyrir framan markið.
Bestu leikmenn
1. Elmar Atli Garðarson
Mark og stoðsending úr vængbakverðinum í dag.
2. William Eskelinen
Frábær í dag. Varði öll dauðafærin, skotin og greip fyrirgjafir þegar á þurfti.
Atvikið
Fyrsta markið. Við það breyttist leikurinn til muna.
Hvað þýða úrslitin?
Vestramenn eru komnir á skrið, taplausir í þremur leikjum og eru 3 stigum frá fallsæti, aðeins stigi á eftir KR. Fyrir vesturbæinga er þetta bakslag í heimkomu Óskars Hrafns. Hann þarf auðvitað tíma til að byggja upp lið en varnarleikur liðsins var ekki upp á marga fiska í dag. Það þarf að laga.
Vondur dagur
Alex Þór Hauksson átti ekki sinn besta dag á miðjunni hjá KR. Var ekki að tengja sendingar og skilaði slakri varnarvinnu. Framlínan hjá KR hlýtur að vera ósátt að fá öll þessi færi en skora ekki. Atli, Benóný, Luke Rae og Aron Sig taka það til sín.
Dómarinn - 9
Frábær í dag eins og við mátti búast, ekkert yfir honum að kvarta