SKÝRSLAN: Maður sá í hvað stefndi
Hvað réði úrslitum?
Leiknismenn voru með öll tök á vellinum nánast fyrstu 70 mínúturnar. Þeir spiluðu frábærlega á köflum og 1-3 staðan var sanngjörn. En í lokin voru þeir ekki nógu sniðugir og sýndu ákveðna heimsku. Dagur Ingi minnkaði muninn aleinn á fjærstönginni og svo voru gestirnir ekki nógu skynsamir. Maður sá í hvað stefndi eftir annað markið; þetta þriðja mark var alltaf að fara að koma, sú var tilfinningin. Í stað þess að mjólka tímann, fara með boltann upp í horn og þannig þá hleyptu Leiknismenn heimamönnum upp í sókn og jöfnunarmarkið kom. Alvöru dramatík og læti í lokin.
Bestu leikmenn
1. Arnór Ingi Kristinsson (Leiknir R.)
Mér fannst hann frábær lengst af í hægri bakverðinum hjá Leikni. Var mikið upp og niður hægri kantinn og átti góðan þátt í fyrsta markinu.
2. Omar Sowe (Leiknir R.)
Skoraði eitt mark af miklum krafti og átti stóran þátt í öðru markinu sem Leiknir skoraði. Á að vera að spila í Bestu deildinni.
Atvikið
Það er auðvitað bara jöfnunarmarkið. Maður sá í hvað stefndi þegar annað markið kom gestirnir voru ekki nógu skynsamir, það vantaði einhvern reynsluna á þeim tímapunkti. Leiknismenn í stúkunni voru algjörlega brjálaðir.
Hvað þýða úrslitin?
Grindavík er með 21 stig um miðja deild, í miðjumoði. Leiknir er með 18 stig og er fimm stigum frá fallsvæðinu. Kannski verður þetta mikilvægt stig á endanum.
Vondur dagur
Á endanum eru það bara Leiknismenn því sigur í dag hefði komið þeim í mjög fína stöðu. Grindvíkingar áttu ekki mikið skilið miðað við frammistöðuna lengst af og það er bara klaufaskapur hjá Leikni að kasta þessu svona frá sér. Marko Zivkovic var eini leikmaðurinn hjá Leikni sem kom inn á og hann leit ekki vel út í jöfnunarmarkinu. Hann verður að gera miklu betur ef hann ætlar að koma sér í byrjunarliðið.
Dómarinn - 3
Mér fannst eins og Færeyingurinn og aðstoðarmaður hans á línunni vissu á köflum ekki hvað þeir væru að gera. Margar furðulegar ákvarðanir og virtist hann oft bara hlusta á hróp og köll, ekki að dæma eftir eigin sannfæringu.