SKÝRSLAN: Toppbaráttan í einum hnút
Hvað réði úrslitum?
Keflavík nýtti fleiri færi en ÍBV svo einfalt er það. Inn í það spilar þó líka að lið Keflavíkur steig upp á lykilaugnablikum í leiknum og vann sannarlega fyrir stigunum þremur. Hlutlaust mat er þó að það hefði ekkert verið ósanngjarnt að liðin skiptu stigunum á milli sín. Þannig virkar þetta ekki þó.
Bestu leikmenn
1. Sindri Snær Magnússon
Sindri var í gír á miðju Keflavíkur í kvöld. Varði vörn sína vel og skilaði boltanum vel frá sér. Átti lykilsendingu í öðru marki Keflavíkur og lék heilt yfir mjög vel.
2. Vicente Valor
Leikmaður sem heillar mig. Gott auga fyrir spili og átti fínan dag.
Atvikið
Þriðja mark Keflavíkur og það sem réði úrslitum. Vond hreinsun frá marki sem leiðir af sér auðvelt og dýrmætt mark fyrir Keflavík.
Hvað þýða úrslitin?
Keflavík fer í 34 stig og minnkar bilið í ÍBV niður í 1 stig. Keflavík situr í öðru sætinu fyrir ofan FJölni á fleiri skoruðum mörkum en Fjölnismenn geta komist á topp deildarinnar á ný vinni þeir leik sinn gegn Gróttu á morgun.
Vondur dagur
Alex Freyr Hilmarsson sá mæti piltur kom á yfirsnúning inn í leikinn af bekknum. Var ekki búinn að vera lengi inn á þegar það fauk í hann eftir að hann taldi ÍBV eiga að fá víti. Gott og blessað enda ástríðusport en hann tryggði veru sína í þessum reit síðar í leiknum. Þar tók hann niður alla kryddhilluna í heilu lagi til að krydda með tilþrifum fall sitt eftir viðskipti við Oleksi Kovtun leikmann Keflavíkur. Báðir fengu gult fyrir stælanna og áfram gakk.
Dómarinn - 8
Eins og svo oft áður bara virkilega heilsteypt hjá Erlendi og hans teymi. Svo sem engu við það að bæta.